“Laurun deboriada”: materiai didatics por renforzé le lingaz ladin
Le Ciamp pedagogich á lauré fora materiai didatics nüs por les scores primares tles valades ladines – “Valorisaziun y sostëgn dl lingaz ladin”
BALSAN (USP). “Laurun deboriada!”, chësc é l’invit che le Ciamp pedagogich, sot ala direziun de Maria Kostner, á mené fora al personal insegnant y ales mitans y ai mituns dles scores primares ladines, meton a desposiziun na seria de materiai didatics nüs, che é gnüs presentá ai 25 de setëmber a San Martin de Tor, te Val Badia, y ai 27 de setëmber a Sëlva, te Gherdëna.
“Ara se trata de bëgn 16 unités didatiches che se desfarenziëia danter trëi liví de dificolté. Ares é dötes liades al titul “Laurun deboriada” y ares trata argomënc desvalis fora dla vita da vigni de”, spliga la colaboradëssa dl Ciamp pedagogich dla Intendënza y Cultura Ladina, Veronica Rubatscher, che á metü adöm le material y che á ince albü tles mans la coordinaziun dl laur. Ince sce le material é por ladin, vëgn le personal insegnant impó racomané da adoré chëstes propostes de laur te dötes les materies, nia ma tratan l’ora de ladin, se tratera pö de tematiches dër desvalies, che stlüj ite danter l’ater ince l’educaziun zivica. "Dötes chëstes unités é cotan deplü co ma la soma de sües perts – porchël é chisc materiai ditatics nüs de gran importanza nia ma por ti insigné damí le plurilinguism a nostes scolares y a nüsc scolars, mo ince por promöie y ti dé inant competënzes desvalies te na manira inovativa. I ti feji n gran complimënt a dötes les colaboradësses y a düc i colaboradus dl sistem formatif ladin por chësc proiet de gran valüta”, á sotrissé l’assessur ala Formaziun y Cultura ladina, Daniel Alfreider.
Material interdisciplinar por l’insegnamënt
La Box dl ABC, che é na scatora de letöra cun l’azënt sön vigni lëtra dl alfabet, contëgn na seria de schedes te 4 lingac, che dess descedé tles mitans y ti mituns la ligrëza da lí y la coriosité da jí plü sot te val’ tematiches. Lapró él ince gnü partí fora cartelins por la scritöra lëdia, tres te 4 lingac: todësch, talian, ladin (idiom dla Val Gherdëina y dla Val Badia) y inglesc) por incorajé y ti fá ciafé vëia ales mitans y ai mituns da scrí stories, rimes y ater. Dötadöm se tratera de material interdisciplinar, che pó gní adoré te deplü materies y che tol ite na gran varieté de tipologies de insegnamënt. Al vëgn renforzé le laur autonom, respetan les inteliënzes desvalies - cossa che mëss aldedaincö gní sostignida te dötes les scores - sciöche chëra linguistica, matematica y logica, naturalistica, musicala, cinestetica, esistenziala, intra- y interpersonala. La pert plü inovativa é dessigü chëra dl lian cun i mesi digitai, olache les mitans y i mituns vëgn portá a descurí na pert dles ativités sot forma digitala, y impara insciö da conësce i vantaji y l’aiüt che i media nüs nes pîta incö. “I materiai didatics nüs dess insciö podëi renforzé y valorisé nosc lingaz ladin”, chësc á ince alzé fora l’ispetur Albert Videsott.
La iesta grafica é gnüda realisada en pert dl Ciamp pedagogich instës y en pert dala dita inciariada: Abler-GmbH "Die Farm". I materiai didatics tla varianta dl ladin badiot y tla varianta dl ladin gherdëna é gnüs metüs a desposiziun dles insegnantes y di insegnanc de dötes les scores primares dilan ala colaboraziun dl’Istitut Ladin Micurá de Rü y dl Ofize Chestiuns linguistiches.
Clican chiló röiun ala verjiun originala dl comunicat stampa por visualisé imajes, documënc o video che taca lapró
red
