Calënder da mur y da mëisa 2025 mostra la Euregio te chedri
L Calënder dla Euregio 2025 unit ora y ie da avëi debant – 49 pultrëc dl Tirol, de Südtirol y dl Trentin nes cumpanieia tres l ann de calënder – Leprò traverc de jites, rezetes y curiusiteies da savëi
BULSAN (USP). Belau fluoriszëntes ie la lumes poleres che luna dalonc sëura l massif dl Großglockner ora. Chësc pultrët plën de culëures ie sun la prima plata dl Calënder dla Euregio 2025 unit ora nstadì. Tosc iel da avëi coche calënder da mur o da mëisa.
N merdi ai 15 de utober à la Euregio Tirol-Südtirol-Trentin prejentà l calënder nuef tla sënta dla Euregio tl Waaghaus a Bulsan. De ndut à 203 fotografes/fs hobby mandà ite passa 2.000 fotografies. De chëstes n à la iuria cris ora 49 per l calënder: for cater per uni mëns y la fotografia dancà.
L presidënt dla Euregio y presidënt dla Jonta provinziela de Bulsan Arno Kompatscher à laudà la/i fotografes/fs prejëntes/c: „ Cun pultrëc che lascia n pert zënza fla ne ëis nia mé te na maniera otica ‚passa via sëides‘, ëis nce fat tumé nosc uedli sëura i cunfins via de viers dla richëza de nosc trëi raions.”
N referimënt a chësta richëza à nce fat i presidënc dl Tirol Anton Mattle y dl Trentin Maurizio Fugatti. I ne ova pervia de d’autri terminns nia pudù vester prejënc, ma i à mandà n messaje de salut: “La richëza se mostra y se desmostra tl bel mescedoz de cuntreda, flora y fauna, architetura y jënt,” da coche à dit Mattle. Aldò de Fugatti ti dà l calënder na sburdla „al savëi dla storia deberieda y dla natura y cultura dla Euregio y renfurzea l sentimënt de purtenienza y de cuejion de si jënt.”
Per l prim iede mostra na cherta geografica nce ulà avisa che duta la fotografies ie unides fates. Oradechël vëniel prejentà traverc per jites y escurscions y rezetes de cësadafuech tla Euregio.
Na gran lauda ti ie jita ala fotografia danca dl calënder, cun chëla che Hans Bergmann de Strassen tl Osttirol ova sapù da pië y repurté la lumes polares di 11 de mei sëura l Großglockner. “Cun marueia - cun la bocia davierta – éi do doi ëura de arpizeda pudù fermé chësc spetacul naturel,” à dit Bergmann.
Da giaté te duc i raions dl’Euregio
L calënder ie da abiné debant dai 26 de utober inant tl Tirol y dai 18 de nuvëmber inant te Südtirol y tl Trentin, nchin che l n ie. N possa jì a s’l tò diretamënter te un di trëi ufizies Euregio de Bulsan, Dispruch y Trënt. Oradechël iel te Südtirol danman te duc i Palac provinziei y vën nce partì ora dai ispeturac di bòsc y dala biblioteches zentreles, tl Trentin iel da giapé ti ufizies periferics dl’aministrazion provinziela y tl ufize de nfurmazion de Plaza Dante. Tl Tirol iel nce mesun apusté l calënder per l giapé tres posta, ti scrijan a euregio@tirol.gv.at.
Sun la plata internet dla Euregio iel da abiné la lista de chiche dà ora y nce la verscion digitela dl calënder.
gst/dl
