L’assessur Alfreider á vijité la Scola de Creativitá de Urtijëi
L’assessur provinzial ala Formaziun y Cultura ladina Alfreider a vijité la sënta nöia dla Scola de Creativitá de Urtijëi, n laboratore artistich tan co unich, che porta adöm tradiziun y inovaziun.
URTIJEI (USP). –L’assessur provinzial ala Formaziun y Cultura ladina, Daniel Alfreider, á tut sö cun entusiasm l’invit da jí a vijité la sënta nöia dla Scola de Creativitá de Urtijëi, n laboratore artistich tan co unich, che porta adöm tradiziun y inovaziun. Chësta realté formativa, nasciüda dan da cater agn sön scomenciadia y dilan al impëgn dla lia La Vëta, fej conësce y trasmët ai jogn y ales jones le gran patrimone cultural dles espresciuns artistiches desvalies, y ara fej crësce te ëi l’aspet dl’identité ladina liada al’ert y a süa creativité.
Le proiet dl laboratore artistich pó fá cunt söla colaboraziun dles scores elementares y mesanes de Gherdëna, y ince dl Lizeum Artistich Cademia, olache la Scora profescionala por l’Artejanat artistich á süa sënta. Ala incuntada á tut pert ince Ute Senoner, direturia dla direziun raionala Sëlva, Monica Senoner, direturia dla direziun raionala Urtijëi, y Maria Teresa Mussner, direturia dl Lizeum Artistich Cademia.
Tratan l’ann de scora vëgn i scolari y les scolares dles classes terza y cuarta elementara y düc i scolari y les scolares dles mesanes acompagná te so percurs creatif da n team de diesc maestri y artisc, chi che ti insëgna, i consiëia y i dëida da realisé n proiet artistich original.
Les ativités vá dal laur cun la rejila ai modei de ghips, dal dessëgn de comics ai laurs de grup. Mo al ne mancia sambëgn nia le ziplé y les scoltöres de lëgn, söi fostüs dla gran tradiziun dl ziplé gherdëna: chiló á i scolari la poscibilité da imparé tecniches desvalies, che é arpejun artistica da tröpes generaziuns incá.
Por la fin dl ann él preodü da cherié la scenografia y l’alestimënt de n pic toch teatral dediché ai geniturs y ai apascioná. Tres chësc evënt oressun partí le laur realisé ia por l’ann y mostré sö i bi resultac che la creativité de mituns y mitans á porté pro.
“Na te sort de proiet desmostra sciöch’ l’ert sides n stromënt educatif de gran valüta y sciöch’ l’ativité artistica sides n’ocajiun de svilup personal plü sot y complet” á dit l’assessur Alfreider, che á laldé le laur di insegnanc, l’entusiasm di scolari y dles scolares y l’impëgn apascioné dla lia La Vëta, che é dal pröm incá la dërta anima dl proiet.
“Mia audanza é che chësta scomenciadia, che mostra sö na bela y buna fundamënta, pois crësce tres deplü y devëntes n punt de referimënt por la comunité dla valada. Y sperun che danter i mituns y les mitans che tol sö chiló les tecniches artistiches, al pois gareté n bun scoltur o na buna scolturia” á injunté l’assessur.
Damian Piazza, mëmber dl consëi de aministraziun adöm a Aron Demetz, Helene Demetz, Peter Kostner y Emanuela Plancker, á sotrissé: “Chësta lerch nöia ti vëgn metüda a desposiziun ince ai studënc y ales studëntes dl Lizeum Artistich Cademia y dla Scora profescionala por l’Artejanat artistich: la fin dl’edema pói la tó cá sciöch’ laboratore.”
Les ultimes parores dl assessur ti é jüdes ala lia La Vëta, por la rengrazié: “La Vëta á metü ite pasciun y impëgn por realisé chësta Scola de Creativitá che é na realté tan co unica, olache l’identité y les tradiziuns ladines se moscëda ite te percursc artistics y creatifs daldöt jonii y inovatifs, fac sön mosöra dles generaziuns che vëgn docá”.
N ejëmpl garaté de coche ara vá da tó ca la tradiziun y l’ert por fá crësce y stimolé culturalmënter döta la comunité de Gherdëna, che adora, sciöch’ dötes les beles tradiziuns, n renovamënt artistich-cultural.
red
