Te Südtirol iel damoinla da fé de ublianza almanco un n ann de scolina
L ultimo ann de scolina devënta n ann de ublianza, la deliberazion se lascia mé fé tres na autodetlarazion – Dut chësc vën a valëi dal ann de scola che vën 2025/26
BULSAN (USP). Sun pruposta di trëi assessëures provinziei Philipp Achammer, Marco Galateo y Daniel Alfreider à la Jonta provinziela de Bulsan dat pro ai 3 de dezëmber i criteres y i details de n ann de scolina de ublianza. Chësc univa legislativamënter bele lascià pro da na lege provinziela revardënta dl 2008 y vën metuda n droa per ti sté do ai traverc generei de furmazion, aldò de chëi che jì a scolina ie na rejon de uni mut y uni muta. “L valor soziel tan grant dla scolina coche prim livel de furmazion ie bele mustrà su te na maniera tlera. L fova perchël bon y drët de slargé ora aldò la ublianza de furmazion,” à dit l assessëur provinziel Daniel Alfreider. Nce i assessëures Galateo y Achammer ie dla minonga che l sibe, cun chësta delibera, unì renfurzà la valivanza de upurtuniteies tla furmazion, cun na fazion dut ntëur positiva de viers dl svilup emuziunel, soziel y cunitif dla mutans y di mutons. “L se trata de na mesura de prevenzion mpurtanta. Nce sce on de mesaria n livel aut de prejënza te scolina, réstel mpo 2 nchin a 3 percënt de mutans y mutons che ne va nia a scolina tl ultimo ann, canche i à danter cinch y sies ani. Aldò nce dla Sunieria di Jëuni ie pona chisc mutons chëi che à plu tert da mustré su l majer bujën de assistënza,” nscila l assessëur provinziel Philipp Achammer.
La ublianza de jì ala scolina vel damoinla per mutons y mutans che à bele cumplì i cin’ani danter mei y agost dl ann de scolina a chëla che la iscrizion fej referimënt y per chëi che cumplirà i cin’ ani nchin al auril dl ann de scolina a chël che la iscrizion fej referimënt. Sce l ie genitores che uel ti tò demez a si mutons y mutans la ublianza de scolina, muessi dé ju na autodetlarazion, ulache i se sëurantol la ublianza de pité ativiteies furmatives che vede ite tl cheder di criteres de curnisc per la scolina te Südtirol. L’ativiteies furmatives se lascia paredlé cun l nseniamënt de scola da pert di genitores. Chësta detlarazion muessa unì data ju te Chemun ulache n à la residënza, ti terminns preudui. L ambolt o la ambolt cuntrulea aldò di terminns dai dant sce duc i mutons tuchei sibe bën scric ite te scolina o che i sibe n auternativa deliberei da na autodetlarazion di genitores. Sce n ne toma nia ite te un di doi caji, ti vëniel mandà na lëtra de craunia, sce l ne vën nce pra chësta deguna resposta, ti vëniel fat a l savëi l cajo ala Procura pra la Sunieria di Jëuni. L cuntribut per i custimënc te scolina ie chël dl paiamënt per l maië. Presupost per jì ala scolina resta te uni cajo che n se tënie ala normatives n con’ dl’ublianza dla dlavea.
ck
