André Comploi é le Diretur nü dl Departimënt Scora y Cultura ladina
Incö, ai 17 de dezëmber, é André Comploi da Al Plan de Mareo gnü nominé Diretur dl Departimënt Scora y Cultura ladina.
BULSAN/BALSAN (USP). Le Departimënt Scora y Cultura ladina se dá jö cun les dezijiuns strategiches por ci che reverda le sistem dla scora, dla formaziun y dla cultura ladina, la destinaziun dles ressorses metüdes a desposiziun dal bilanz provinzial, la gestiun dl personal y la promoziun de ativités, de proiec y de investiziuns culturales. Le Departimënt é metü adöm dales döes repartiziuns Aministraziun Scora y Cultura ladina y Direziun provinziala Scolines y Scores ladines, dai dui ufizi Aministraziun scolastica y Cultura ladina y Jonëza, dal Ispetorat dles scores y dal Ispetorat dles scolines, dal Ciamp pedagogich y dal Sorvisc por l’inclujiun.
"I sun ausé da me confronté y da lauré cun n grüm de colaboradusc, y i á dagnora ciaré da porté ite n bun clima de laur. Ince te mia inciaria nöia chiriarái la colaboraziun de düc y le dialogh costrutif cun i departimënc dla cultura todëscia y taliana" á dit André Comploi te süa audiënza cun l’assessur Daniel Alfreider.
Da süa pert, é Alfreider dla convinziun che la nomina de André Comploi rapresentëia n valur por döt le monn cultural ladin. "Al é na porsona jona y dinamica, cun na gran esperiënza tl ciamp cultural: al portará ite tla aministraziun publica süa esperiënza, so entusiasm y so amur por la musiga, l’ert, la leteratöra y le lingaz y ladins."
André Comploi á studié Disciplines teatrales y Musicologia tl’université da Viena. Dal 2010 al 2020 él sté responsabl dl ufize stampa dl Teater dl’Opera de Viena, y dal 2020 inant él sté Coordinadú artistich dl teater La Scala de Milan. Al fej pert di comités scientifics de deplü istituziuns culturales, tla Talia y tl foresto, al á madorí esperiënzes a livel internazional tl ciamp dla comunicaziun. Al á tigní cursc söla Storia dla musiga y söla comunicaziun culturala te deplü universtés. Apascioné de cultura musicala ladina, ál dé fora deplü publicaziuns sura les cianties ladines, ince por mituns, y á scrit deplü contribuc scientifics sura les operetes de Angelo Trebo.
A André Comploi ti vá les mius audanzes de bun laur da pert dl assessur competënt, Daniel Alfreider.
red
