I ladins ghesć d’onur pro le Bal di Croac a Viena
Ai 18 de jená á na delegaziun culturala ladina daurí le 78ejima ediziun dl Bal di Croac da Viena cun bai y cianties tradizionales portá dant da grups de Gherdëna, dla Val Badia y dla Val de Fascia.
VIENA (USP). Al ê le pröm iade che n bal dla cité de Viena gnê dediché ala mendranza ladina. Le grup de bal folcloristich de Gherdëna “Grupa Balarins de Gherdëina”, le cor dla Val Badia “Decá y Delá” y le grup folcloristich fascian “Grup de folclor de Soraga” á presenté bai tradizionai, cianties popolares, usanzes y tradiziuns ladines. La manifestaziun é gnüda presentada dala jornalista de Rai Ladinia Jasmin Ferdigg adöm a Marin Berlakovic. Danter i grups musicia che é jüs sön paladina, él da alzé fora le “OdleSound” de Gherdëna.
La manifestaziun é gnüda sostignida dala Provinzia Autonoma de Balsan y dala Regiun Trentin-Südtirol. Le program é gnü coordiné dala Uniun Generela di Ladins dla Dolomites, cun a ce Milva Mussner.
A ce dla delegaziun ladina êl le vizepresidënt y assessur provinzial ala Formaziun y Cultura ladina, Daniel Alfreider, che á detlaré: "Le Bal di Croac da Viena mët vigni ann n tema spezifich te so zënter. Le fat che la mendranza ladina é gnüda cernüda en chësc ann é n gran onur, deache ara rapresentëia dër na bela ocajiun por fá conësce nosta cultura, cun sües tradiziuns y sües usanzes secolares, sura i confins dla provinzia fora. La colaboraziun danter Südtirol y d’atres regiuns y mendranzes europeiches é por me na priorité, y i rengraziun düc chi che á daidé pro por fá garaté chësc barat."
Le de denant é la delegaziun culturala ladina jüda a vijité l’ufize dl Presidënt dl’Austria tla Hofburg de Viena, olache ara é gnüda tuta sö dal vize-diretur de gabinet, Markus Langer, por n confrunt sön la situaziun dles mendranzes ladines. «Incö sunse chiló por dé inant cun cosciënza na desmostraziun de nosta identité y de nosta cultura, cuntënc che nosta autonomia nes conzed döt chësc», á sotrissé le diretur dl Departimënt Intendënza y Cultura ladina, André Comploi. L’incuntada á promoiü y renforzé la rëi de barat y de colaboraziun profescionala danter Viena y le Südtirol. «Podëi se mostré a livel internazional é val’ de fondamental por nos Ladins, y Viena á dagnora albü n rode de gran valüta de chësc vers», á alzé fora le Diretur dla Repartiziun Aministraziun Scora y Cultura Ladina, Mathias Stuflesser. La delegaziun ladina á ince incunté le professur universitar de Musiga Sacra y orghelist badiot Manuel Schuen, y le scoltur y restauradú Hannes Rindler, inc’ ël originar dla Val Badia, por mantigní vi le dialogh y le sëns de portignënza ti ladins che vir foradecá.
red
