Stanziamënt de 12,5 milions de euro per la Cësa di Ladins de Urtijëi
Ncuei à la Jonta provinziela dat pro l stanziamënt de 12,5 milions de euro per i lëures de ressanamënt y de ngrandimënt dla Cësa di Ladins y dl Museum Gherdëina
URTIJEI (USP). L Museum Gherdëina tla Cësa di Ladins de Urtijëi reprejënta n patrimone storich y culturel de gran valuta per l luech, per duta Gherdëina y nce per l’autra valedes ladines. Dal 1960 incà iel deventà n pont de referimënt fundamentel per la cultura dla valeda. Ti ani à la cësa nce dat d’albierch ala Lia dl teater, ala bibliotech Anda Malia da Cudan, ala sënta dla Union di Ladins de Gherdëina, ala redazion dla zaita La Usc di Ladins y ala sënta dla Union Generela di Ladins dla Dolomites. Da truep ani incà ne curespuend l fabricat nia plu ai bujëns de lerch y de segurëza dl Museum y dla lies che à iló si sënta. L’aministrazion cumenela de Urtijëi deberieda ala Union di Ladins de Gherdëina, patrona dl fabricat, à bele ti ani passei cris d’uni sort de soluzions per pudëi ressané l fabricat, ma l ne n’ie mei stat mesun abiné la drëta. Dan 5 ani à l Presidënt Arno Kompatscher fat na pruposta de cunvenzion, per pudëi stlù ju la cuestion te na maniera definitiva. Scebën che chësta soluzion à giapà truepes resistënzes tl mëterman, ala sën giapà forma: l ie stat puscibl abiné n’acurdanza danter la Provinzia autonoma de Bulsan - Südtirol, l Chemun de Urtijëi, i autri chemuns dla valeda y i patrons dla cësa deberieda cun la lies.
Ncuei à la Jonta provinziela dat pro l stanziamënt de 12,5 milions de euro per i lëures de ressanamënt y de ngrandimënt dla Cësa di Ladins y dl Museum Gherdëina.
Cun l bënsté dla Cunsulta ladina finanzierà l Assessorat provinziel ala furmazion y ala cultura ladina, l Ufize museums de Südtirol y la Region Trentino Südtirol na bona pert di lëures, ntant sce se mpënia l Chemun de Urtijëi y i autri chemuns de Gherdëina, chël de S.Cristina, chël de Sëlva y chël de Ciastel, a finanzië l’autra pert di lëures. A chësta maniera deventerà l Chemun l patron dl fabricat nuef, che dajerà d’albierch al Museum Gherdëina. Per chël che reverda i cosc de gestion dl museum vëniel mo ora ti mënsc che vën d’autri stlarimënc.
Do l’apruvazion da pert dla jonta à l Assessëur provinziel ala furmazion y ala cultura ladina Daniel Alfreider detlarà che: "Cun l finanziamënt de chësc proiet iel finalmënter unì metù na fundamënta, ma savon che la streda da jì ie mo longia. Ie rengrazie l Presidënt Arno Kompatscher che à daniëura abù crëta te chësc proiet, l assessëur Philipp Achammer, sëurastant di museums de Südtirol, l Chemun de Urtijëi cun i autri chemuns y la frazions ladines che à for culaburà, i respunsabli de nosc ufizies y nce la Cunsulta culturela ladina: cun l mpëni de duc canc iesen stac boni de fé n var mpurtant tla drëta direzion. Chësta cësa sarà n simbol dla cultura ladina de Gherdëina, na cultura che puderà nsci deventé mo plu viva y ativa, n post che lieia l modern cun la tradizion y che renforza la richëza de nosta identità ladina. La dëssa vester na luegia per l’ert, per la tradizion, per nosc artisc, ma dantaldut per nosta jënt. Sëuraprò dëssela vester tlo per se ancunté, nce per l’autra valedes ladines, ulache duc à lerch per fé furmazion, per rujené y per culaburé per i bujëns di ladins."
red
