I laurs por le rondel de Picolin vá inant
Condiziuns stradales plü sigüdes y na miú zircolaziun dl trafich: le rondel de Picolin ciafa tres plü forma. I laurs vá indô inant y messass gní completá por jügn.
SAN MARTIN DE TOR (USP). I laurs de costruziun dl rondel de Picolin, tl comun de San Martin de Tor, tla Val Badia, é indô piá ia. «Cun le rondel orunse mioré la segurëza pro l’incrujada danter la strada statala dla Val Badia y la strada provinziala che condüj söl Ju de Börz y che passa por San Martin. En particolar messass les porsones che vá a pe y i anuzadus dl trasport publich trá n vantaje dala zircolaziun nöia dl trafich» dij l’assessur provinzial ala Mobilité Daniel Alfreider.
Na pert importanta dl intervënt é la proietaziun dl mür de strada danter la strada statala dla Val Badia (SS244) y la strada por Börz (LS 29). Le mür da sëgn gnará trat demez y baraté fora cun na costruziun nöia, che ará na strotöra a mosaich cun podrouns de graní. «Chësc intervënt ne miorëia nia ma la stabilité dl raiun stradal, mo al contribuësc ince ala valorisaziun dla odüda», spliga le responsabl dl proiet Davide Ziller. Implü gnará le mür nü sposté de 60 zentimetri söpert, por che al sides plü saurí desgorje la nëi d’invern. I laurs de costruziun vá inant aladô di planns, chël ó dí che le rondel nü dess gní completé por le mëis de jügn 2025.
san/cs
