Proteziuns cuntra la tomada de peres: dui intervënc
Al é preodü da fá intervënc por stravardé la strada dala tomada de peres y por aumenté la segurëza. L’assessur provinzial Alfreider: «Laurs indespensabli a gauja di danns dl chefer»
MAREO/SAN MARTIN DE TOR (USP). Al é preodü dui intervënc sön la strada statala dla Val Badia (SS244) danter i comuns de Mareo y de San Martin de Tor: ara se trata de mosöres de proteziun por mëte en segurëza la strada dala tomada de peres. Te süa sentada ai 25 de merz, á la junta provinziala aprové i intervënc tecnics y i cosc stimá por trami i proiec.
«I efec che le chefer á albü söl bosch nes sforza da fá chisc laurs, y da i fá cun prescia, por ti garantí plü segurëza ala strada dla Val Badia» sotrissëia Daniel Alfreider, assessur provinzial ala Mobilité. L’apalt por i laurs gnará publiché tosc. «Sce le cosses vá iannt zënza problems, podess i laurs mëte man bele da d’altonn dl 2025», injunta l’assessur provinzial.
Le pröm intervënt, tl comun de Mareo, é preodü danter le chilometer 10+000 y le chilometer 10+500 dla strada dla Val Badia; i cosc de chësta opera é stimá te 750.000 euro. Le secundo intervënt, tl comun de San Martin de Tor, é preodü danter le chilometer 11+500 y le chilometer 12+800, por n cost stimé de incër 2,5 miliuns de euro.
gm/mpi/cs
