Gherdëina: lëures per asfalté scumëncia ai 5 de mei
L ie unì fat ora l plann de tëmp per la streda statela de Gherdëina SS242 y per la streda che va sun Jëuf de Frea SS243 – Sëuraluech cun i tecnics
GHERDËINA (USP). Sun la streda de Gherdëina (SS242) y sun la streda che va sun Jëuf de Frea vëniel tosc fat lëures per mëter ju asfalt nuef. Nstadì iel stat n sëuraluech cun reprejentanc dl Servisc per la Stredes Salten-Scilier, la mpreja da frabiché Goller Bögl y l uperadëur dla rë de auta tenscion Terna, per fé ora l plann de tëmp per i lëures de asfalté. Cun i lëures uniràl metù man ai 5 de mei ora Runcadic, per jì inant do y do nchin su sun i Jëufs dla Dolomites. Preudù iel de renuvé defin tramedoi cursies di tòc tuchei. Chisc lëures de asfalté ie jic debujën pervia di lëures per seguré y miuré la rë dala lectrisc che ie unii fai ultimamënter.
"Scumencion per tëmp y ëura d’ansciuda, per renuvé la stredes y fé che l sibe nscila cundizions utimeles de streda, dantaldut cun referimënt ala sajon auta," sotrissea l assessëur per la mubltà Daniel Alfreider. L se trata de ntervënc cuordinei y che va debujën, che ti va a bën dla segurëza de duc chëi che se noza di per di de chësta stredes.
"On purvà a mëter ju n plann de tëmp de slune ma nce modulà var per var, a na maniera che chiche se muev ebe l manco desturb che l ie mesun, per ti jì ancontra l plu che la va a chiche viv y lëura te valeda," njonta Philipp Sicher, diretëur dl Servisc dla Stredes.
Tòc de streda tuchei sun la streda de Gherdëina (da mei inant)
- Runcadic: da km 10+300 nchin km 10+750
- Runcadic: da km 11+150 nchin km 11+350
- Urtijëi: da km 12+920 nchin km 13+170 y da km 13+370 nchin km 13+850
- Urtijëi: da km 14+000 nchin km 14+800
- St. Cristina: da km 16+400 nchin km 16+650
- Sëlva: da km 20+350 nchin km 22+000 (da mei nchin de juni)
Tòc de streda tuchei sun la streda che va sun Jëuf de Frea (da juni inant)
- da km 2+000 nchin km 4+500
- da km 5+380 nchin km 5+410
- da km 5+500 nchin km 5+700
an/mpi/red
