Aprové le Plann de destribuziun scolastica 2025 – 2030
La Junta provinziala á aprové tla sentada da incö le Plann de destribuziun dles scores altes ladines por i proscimi cin' agn.
BULSAN (USP). La lege provinziala n. 12 di 29 de jügn dl 2000 prevëiga che la Junta provinziala renovëies vigni cin' agn le plann de destribuziun dles scores.
Por ci che reverda l’oferta formativa dla scora alta prevëiga la lege provinziala n. 11 di 24 de setëmber dl 2010 che la Junta provinziala aprovëies diretives sön la politica educativa y definësces le plann de destribuziun dl’oferta formativa a na moda da tigní cunt dles particolarités y di bojëgns spezifics di trëi grups linguistics.
Tl plann de destribuziun aprové él chëstes scores y direziuns: L’Istitut Tecnich Economich “Raetia” cun les direziuns: Aministraziun, finanza y marketing; Aministraziun, finanza y marketing direziun sport; Turism.
Le Lizeum artistich “Cademia” cun lapró la Scora profescionala provinziala por l’artejanat artistich: Le Lizeum artistich pîta chëstes direziuns: Ert figurativa, Grafica y Design. La scora profescionala provinziala por l’artejanat artistich pîta i percursc formatifs de Scoltöra tl lëgn y Depënje – Pitöra decorativa.
Pro les Scores altes de La Ila/Badia tochel l'Istitut Tecnich Economich cun direziun Aministraziun, finanza y marketing, le Lizeum de Sciënzes umanes y le Lizeum linguistich.
Tres na gestiun efiziënta dles ressurses umanes, ti dá l'oferta formativa atuala ai jogn y ales jones ladines posc de formaziun adatá aladô dl model dla scora paritetica ladina.
"Le mantignimënt dles pices scores tles valades é fondamental por le dagní de nosta comunité ladina. Les scores ne pita nia ma na oferta tan co unica, mo ares fej plü sterch ince le marcé dl laur te valada y ares contribuësc al svilup, ala vita dla comunité y ala vitalité di paisc ladins" - insciö le Vizepresidënt y Assessur por la scora y cultura ladina Daniel Alfreider.
Sce al é ma püc studënc y püces studëntes él preodü l’insegnamënt interdisciplinar danter classes paraleles pro la medema direziun de stüde, a na moda da garantí n'adoranza efiziënta dl personal dozënt a desposiziun.
Por scrí le plann de destribuziun scolastica nü ti él gnü damané ai ombolc di Comuns ladins y al Consëi scolastich provinzial n arat.
red
