Potenziamënt dles mosöres de proteziun tl raiun de Mareo
L'obietif é da garantí na majera segurëza. Alfreider: "I fajun intervënc olache al é d’ütl por stravardé che che vá vigni de cun l'auto".
BALSAN/MAREO (USP). Por aumenté la segurëza fora por la strada statala SS 244 dla Val Badia á la Junta provinziala, tla sentada da en vëndres, ai 28 de novëmber aprové n ajornamënt dl proiet che reverda le toch de strada danter le km 10+000 y le km 10+500, tl raiun de Mareo. Tratan les verificaziuns tecniches y i suraposc che é gnüs fac tla fasa de proietaziun esecutiva él gnü fora ciamó d’atri punc debli dla tëmpla, che se damana intervënc plü ampli co ci che an â preodü daimpröma.
Les analises nöies á teco desmostré che al é debojëgn da amplié les barieres parapedruns y da renforzé les rëis de proteziun, tolon ite val’ toc implü y i canaluns dales perts che mostra n prigo romagnënt plü alt. Implü él gnü integré laurs che alda lapró por garantí la funzionalité plëna y la continuité dla proteziun dla strada.
L’assessur provinzial por la mobilité y les infrastrotöres Daniel Alfreider alza fora che la segurëza resta la pröma priorité: "Les verificaziuns nes dij tler che sön chësc toch de strada mësson renforzé les proteziuns. I ciarun atira da fá valch, cun responsabilité, por stravardé les porsones che passa vigni de sön chësta strada y por garantí la mascima segurëza fora por döta la Val Badia."
La Junta provinziala á porchël aprové l'adatamënt dl proiet metü dant dal assessur Alfreider, che ne müda nia la natöra dl'opera, mo ampliëia la capazité de proteziun, sciöche al é ince dé dant tl prospet ajorné di cosc y tla deliberaziun relativa.
Cun le potenziamënt dles mosöres gnarál alzé dassënn le livel de segurëza dl trafich sön strada y smendrí le prigo che al tomes jö peres, che é na cossa che capitëia sovënz te chësc raiun, dantadöt ti tëmps plü critics. Tles proscimes edemes gnarál invié ia les fases operatives ajornades.
red
