Nuviteies pra la vijites sportives dai 1. de merz dl 2026 inant
La Jonta provinziela à regulamentà da nuef la medejina sportiva, cun n si tarifer, cun mudaliteies dut ntëur plu saurides y tarifes basses de 30 nchin a 80 euro
BULSAN (USP). La Jonta provinziela à n juebia ai 5 de dezëmber deliberà la regules nueves per la prestazions de medejina dal sport. Dovia iel l reghister nuef dla prestazions de livel statel, che mët la vijites de medejina sportiva tl ciamp dla prevenzion. Nce te Südtirol muessa chësta prestazions perchël nce unì tëutes ora dal reghister dla prestazions ambulantes dal dutor spezialisà, per les mëter ite te n si tarifer aposta. Nscila se mùdel la regules per scrì ora, paië y per unì deliberà dal paiamënt. L travert dla Jonta provinziela fova chël de mëter adum na regulamentazion nueva atuela y olistica, iuridicamënter y prufesciunalmënter tlera, che curespuende ala prescrizions stateles y che sibe a bën de chiche fej sport te Südtirol.
“Meton sën adum na curnisc moderna y univoca che feje a na maniera che nosc Servisc per la Medejina dal Sport posse ti pité ala atletes y ai atlec ma nce a duta la pasciunedes y a duc i pasciunei de sport nce tl daunì regularmënter vijites de medejina sportiva che sibe cualitativamënter de gran valuta,” auza ora l assessëur per la prevenzion sanitera y per la sanità Hubert Messner. Chësta prestazions ie n cuntribut fundamentel per la prevenzion sanitera y per l sustëni y svilup dl sport y dl muvimënt te Südtirol.
Nce l assessëur per l sport Peter Brunner sotrissea la mpurtanza dl valivamënt: “Lies y sportifs y sportives à debujën de cundizions ntëurvia che sibe stabiles y sun chëles che n posse se lascé, per pudëi planifiché a puntin i alenamënc y la garejedes. Perchël sons bele te n liam de barat strënt cun la lies dal sport, che on nfurmà per tëmp y ëura n con’ dla nuviteies. Nscila giapa la lies y duc i autri atëures dl mond dal sport de Südtirol la nfurmazions che va debujën, y chël mo diretamënter dala funtana.”
Cun l mudamënt vën l manejamënt scialdi plu saurì, n con’ de coche les vën scrites ora y de coche la vijites sportives dal dutor vën pona pitedes y fates. Nce la tarifes ie unides mudedes. La vijita standard de medejina dal sport dl prim livel costa damoinla 30 euro. Vijites ulache n muessa mo ejaminé y tué do sëuraprò costa ntëur a 60 y 80 euro. Paredlà cun d’autra Regions dla Talia ie chësta tarifes scialdi basses, nscila i assessëures.
Na cuestion primera à da n fé cun chël che i mëndri de età, jënt cun handicap y malaties reres y chiche à n mënder davani ne paia defin nët nia per prestazions de medejina dal sport. Per chëstes y d’autra categuries ie nsciuma la prestazions de medejina sportiva debant. Nce tl daunì vëniel da pert dla medejina sportiva sëurantëut de dé ju periodicamënter l arat de idoneità per i ulenteres dla scunanza zevila y dla urganisazions de sucors.
La Jonta provinziela à aposta tenì la tarifes scialdi basses y preudù deliberazions d’uni sort, per pudëi ti garantì a chiche fej sport de ti jì permez saurì ala prestazions, da coche à spiegà i assessëures Messner y Brunner.
L reghister nuef dla tarifes tla medejina sportiva y i regulamënc che toca leprò va n droa ai 1. de merz dl 2026. Teminns per vijites possa coche nchin a ncuecundì unì fac ora tres la zentrela unitera de prenutazion cherdan su l numer de telefonn 100 100 cun i prefisc 0471, 0472, 0473 o 0474, ma nce online.
red/san
