Comunicat stampa

Da (NCUEI) ai 13 de mei sëurantol la Provinzia de Bulsan la presidënza dla fundazion Dolomites-Unesco per i proscimi trëi ani. La Jonta provinziela à dat pro de spënder chëst ann 285.000 euro per l’arpejon mundiela. Sun l program de lëur iel i obietives de tò ite Saslonch y Mëisules tl raion recunesciù dal Unesco.

La Jonta provinziela de Bulsan à (NCUEI) ai 13 de mei dat pro l regulamënt de esecuzion dl’agenzia nueva che cialerà do i cuatieres cunvenzionei. Pernan che l unirà metù a jì l’urganisazion dl’agenzia puderà scumencé l’atività de cuntrol.

Te si segonda senteda da chëst ann à la Cunsulta provinziela per la cultura ladina dat si bënsté a cuntribuc culturei per na soma de 63.500 euro. Per l ann 2013 iel nchinamò unì dat pro n sustëni finanziel da pert dla Provinzia de Bulsan per de ndut 97 scumenciadives, dutes tl ciamp dla Cultura Ladina.

En mertesc, ai 14 de mà vëgnel publiché sön le Boletin Ofizial dla Regiun la lege che regolamentëia les lîtes dl Consëi provinzial. La lege nöia va en forza le dé do, en mercui ai 15.

Spostamënć de ressurses finanziares internes, mesi finanziars implü y na lista dles prioritês ch’al é da afrontè: tl Departimënt por i laûrs publics dla Provinzia vëgnel laurè dassënn por tó y jì i dagns gaujà dal tëmp da d’invern ales strades tl Südtirol. “En chësc ann adorunse gran pert di finanziamënć dl Sorvisc strades por cuncè fora l’asfalt dles strades” alza fora l’assessur Florian Mussner.

Ntan l ultimo inviern à 32 atlec dl Südtirol venciù na bedaia mundiela o arjont n podium de copa dl mond. Danter chisc atlec che ie (INIER) ai 8 de mei unic unerei dal presidënt dla Provinzia y assessëur al sport Durnwalder, iel nce 8 atlec dai luesc ladins.

La trëi grupes de rujeneda dl Südtirol valutea la storia da si pont de ududa. L liber de storia che ie unì prejentà (NCUEI) ai 09 de mei a Bulsan ie unì fat da esperc de duta trëi grupes y ie per duta trëi grupes de rujeneda: l dëssa judé pro a deventé plu cuscienc dla storia deberieda y a chësta maniera a na miëura cunvivënza dla grupes de rujeneda.

L’atività artistica fej pert dla cultura y ie tla valedes ladines drët sentida. Per sustenì chësta atività dla mendranza ladina compra la Provinzia de Bulsan uni tant vel opra d’ert. La cumiscion cherdeda ite dal Assessorat Ladin che dëssa fé prupostes y dé na valutazion sun i priejes, sa à (INIER) ai 08 de mei ancuntà l prim iede.

Cun la cumpededa dla jënt à l Istitut provinziel de statistica ASTAT y l istitut naziunel ISTAT fat na nrescida sun duta la populazion. La prima pert di resultac definitives unirà prejentei n mierculdi 15 de mei dal presidënt dla Provinzia Durnwalder te na cunferënza stampa a Bulsan.

Inier, ai 7 de mà dl 2013 él pié ia la terza ediziun dl concurs de idees “Tourismus trifft Landwirtschaft – Il turismo incontra l’agricoltura” a livel dl’Euregio cun le Südtirol, le Tirol y le Trentin. Tres chësc concurs vëgnel chirì proieć de cooperaziun te chisc dui seturs strategics por i raiuns alpins.