Program dl De
20 agn competënza strades | Daurida dla Plaza Silvius Magnago nöia | Surandada dla gran onoranza de mirit a Ciastel Tirol
Ai 5 de setëmber él le De dl’Autonomia. En chël de dl 1946 él sté i ministri por i afars cun l’ester dl’Austria y dla Talia, Karl Gruber y Alcide Degasperi, che á firmé l’acordanza de Paris. Chësc avenimënt particolar por le svilup dla storia dl Südtirol dess ince ester n simbol de solidarieté, che vëgn ince desmostrada cun le volontariat. N segnal sterch de solidarieté, sciöche ince le sentimënt de portignënza pro le Südtirol é döes carateristiches fondamentales di zitadins.
Iniann sará la tematica prinzipala dl De dl‘Autonomia la chestiun dl passaje dla competënza dles strades dal Stat ala Provinzia: dan da avisa 20 agn él gnü a se le dé por la Provinzia de Balsan la poscibilité da manajé autonomamënter la competënza dles strades.
Döes sará les mostres sön la tematica “20 agn competënza strades” che gnará inaugurades ai 5 de setëmber dales 10. Le tema zentral dla mostra sará la storia de 20 agn, dal 1998 inant, y al gnará presenté i evënc prinzipai y les costruziuns plü importantes che é gnüdes fates. Ala festa él gnü invié zirca 1000 porsones dl setur dles strades, da colaboradus da denant dla Repartiziun a rapresentanc de istituziuns y repartiziuns.
Les prömes döes mostres sará da odëi por trëi dis sön la Plaza Silvius Magnago 1 a Balsan. An podará odëi veicui dl sorvisc strades, sciöche ince proiec dles Repartiziuns Infrastrotöres y Sorvisc Strades di ultims 20 agn. La secunda mostra gnará istalada tla curt interna dl Palaz provinzial 1 y sará daverta por zirca 10 dis. Al sará da odëi le guant da laur dla ANAS y di stradaröi, sciöche ince modí dles costruziuns realisades dals Repartiziun Sorvisc Strades.
Trames döes les mostres é debann. I orars de daurida é
Mostra sön la Plaza Silvius Magnago
da en mercui, ai 5 de setëmber dales 11
cina en vëndres, ai 7 de setëmber da sëra
Plaza Silvius Magnago 1
a Balsan
Mostra tla curt interna dl Palais Widmann
da en mercui, ai 5 de setëmber dales 11
cina en vëndres, ai 14 de setëmber da sëra
tla curt interna dl Palais Widmann
a Balsan
Por savëi de plü sön le tema dles strades
Daurida dla plaza Silvius Magnago nöia
Cun na delibera dla Junta provinziala d‘aurí dl 2010 é la plaza dan le Consëi provinziala a Balsan gnüda nominada en onur dl presidënt dla Provinzia da denant dot. Silivus Magnago. La plaza á insciö inom „Plaza Silvius Magnago“. Implü él ince gnü tut la dezijiun dl 2012 da scrí fora n concurs por n conzet nü dla plaza y che dô porté a na revalutaziun de cualité.
Le conzet nü prevëiga n funz nü de n material su cun la creaziun de sperses de corusc. Implü dessel ince gní istalé poscibilités da se senté jö y trëi tofles cun informaziuns. Por trasmëte ince le lian dla plaza cun i zitadins y le teritore dl Südtirol, él gnü lauré cun peres naturales dla provinzia. Insciö él gnü adoré por les trëi tofles trëi peres de zones geologiches desvalies dla provinzia (raiun alpin a süd, raiun alpin dl a ost y peninicum).
I trëi materiai dess rapresenté la richëza dl teritore y ince i trëi grups linguistics che vir adöm. La fontana dl Laurin gnará spostada dlungia l’entrada dla plaza.
Surandada dla gran onoranza de mirit a Ciastel Tirol
N ater punt culminant dl De dl’Autonomia é la surandada dla Gran onoranza de mirit dla Provinzia de Balsan a Ciastel Tirol. La Gran onoranza de mirit é l’onoranza plü importanta che la Provinzia pó surandé. Cun chësta onoranza vëgnel premié personalités che á dé n contribut important por le svilup de chestiuns südtirolejes. Al pó gní premié rapresentanc di seturs dla sciënza, dl’ert, dla cultura y dl sport. Implü vëgnel ince onoré l’impëgn por chestiuns soziales y umanitares y por la sconanza dl ambiënt.
La manifestaziun vëgn daurida dales 15 te na cornisc musicala dl conservatore “Monteverdi” de Balsan. Daldô sarál spo le professur dl’université Walter Obwexer, spezialist de dërt europeich y costituzional dl‘Université da Desproch che baiará dla cooperaziun al svilup tl Statut d’Autonomia. Do le referat dl professur Obexer gnarál surandé les gran onoranzes de mirit dla Provinzia de Balsan a trëi porsones.
Inhalt teilen: 
