Program dl De

Le De dl'Autonomia ai 5 de setëmber dl 2019 é particolar, ajache le Südtirol recorda dl 2019 trëi avenimënc importanc:

100 agn dal contrat de Saint-Germain10.09.1919, contrat de pesc danter Entente y la Republica d'Austria, zesciun dl Tirol dl Süd y conferma dla spartiziun dl Tirol sön la basa dl contrat socrët de Londra dl 1915. Zesciun zënza condiziuns y zënza proteziun autentica dla mendranza todëscia y ladina.
80 agn dal'Opziun22.06.1939, conclujiun dl'acordanza de trasferimënt danter le Deutsches Reich y la Talia. Basa iuridica por l'opziun, olache le termin jô cina ai 31 de dezëmber dl 1939. La jënt dl Südtirol mëss chirí fora danter le „daciasa“ – y insciö sté te na Talia fascista, che vëiga le „sté chiló“ sciöche azeté l'italianisaziun – y la „nazionalité“ – chël ó dí l'entrada tla Germania nazista totalitara, sciöche ince n dagní che an ne sá nia sciöche al ciarará fora tl forest, sovënz dlungia le front. L’86 porcënt dla jënt dl Südtirol tol la dezijiun da s'un jí sön la basa dles esperiënzes fates y dles pormetüdes de Hitler y dla Germania. 75.000 südtirolej s'un vá spo cina dl 1943 ince tl Deutsches Reich. L'Opziun gauja na gran divijiun tla sozieté dl Südtirol, che vá ma da superé cun gran fadia, por mirit ince dl svilup economich dl tëmp do la vera.
50 agn dal Pachet22.11.1969, azetaziun dl Pachet tres la sentada provinziala dla Südtiroler Volkspartei. Tl Pachet él 137 mosöres por la sconanza dla jënt dl Südtirol: süa realisaziun efetiva dess gní garantida tres n calënder de mosöres fates fora aposta. Le pachet é le scomenciamënt dl Secundo Statut d'Autonomia di 20.01.1972. La realisaziun intiera dles mosöres nominades gareta impormó dl 1992, canche l’Austria dá jö la detlaraziun de apajada dles stritaries.

Chëstes trëi peres miliares dla storia dl Südtirol forma dl 2019 le cheder particolar por le De dl'Autonomia. Ci che á metü man dan da 100 agn cun dolur y tort, é incö n ejëmpl dla convivënza y n'inciaria da fá politica cun responsabilité por le dagní.

Le De dl'Autonomia dl 2019 é n ot danter le passé le dagní .

Por ti cunté ala jonëza la storia dl’autonomia y por ti dé n'odlada al svilup tl dagní dl Südtirol, vá les assessuries y i assessurs provinziai ai 5 de setëmber danmisdé, le 1. de de scora dl ann de scora nü, te 9 scores altes te döta la provinzia. Les studëntes y i studënc dess tó pert ala comemoraziun y al recort sciöche generaziun jona che vëgn docá - a n recort che vëgn odü sciöche premissa por na realisaziun responsabla dl dagní y che dess fá a na moda che la storia ne vëgnes nia desmentiada. Domisdé él tla curt interna dl palaz provinzial 1 la manifestaziun de comemoraziun "Dagní -recort". Do n'introduziun leterara fata dala poetëssa dla Val Badia Roberta Dapunt, i discursc di presidënc dles Provinzies dl'Euregio Günther Platter (Tirol), Maurizio Fugatti (Trentin) y Arno Kompatscher (Südtirol), fej i storics Hans Heiss, Carlo Romeo y Martha Stocker na discusciun sön les peres miliares dla storia dl Südtirol. Spo vëgnel presenté le liber dl vedl diretur general dla Provinzia Adolf Auckenthaler "Entstehung und Entwicklung der Südtirol-Autonomie". N film cört cun i testemoni de chël tëmp Bruno Bertoldi y Robert Kaserer y la nea Judith E. Innerhofer stlüj jö la manifestaziun.

Sitemap