Atualità

USP – Ai 3 de juni toma l tiermul per dé ju lëures y nsci fé pea l cuncors scrit ora dala Provinzia de Bulsan per artisc’ dla valedes ladines. Te chisc ultimi diesc dis possa artisc’ ladins de Südtirol, ma nce de Trënt y Belun mandé ite si lëures d’ert.

USP – A Urtijëi iel ncuei (19 mei) unì premià i sculeies che à venciù l cuncors leterer per la scoles ladines. Chësc cuncors ie unì giaurì ai sculeies de duta la cin valedes ladines dla Dolomites. L ntendënt Roland Verra y l assessëur Florian Mussner à laudà la gran ceratività y la cura dla rujeneda da pert di sculeies.

USP – N dumënia che vën, 24 de mei mostra la RAI de Bulsan la segonda pert dla documentazion sun la storia dl Südtirol. Dala 9.40 danmesdì uniral mustrà l capitul dedicà ala dlieja. L film documenter ie fat per talian cun ntervistes per tudësch y ladin.

USP – Chi che studieia tla Talia y oradecà, y respetea i criteries udui dant, possa damandé dala Provinzia de Bulsan cuntribuc per l ann academich 2009/2010. L Guviern provinziel à da permò dat pro l bando de cuncors aldò. Chi che damanda l prim iede na borsa de studi dëssa bele sën se lascé nuté su.

USP – Studënc de duta la valedes ladines se à dat ju cun leteratura y à prejentà lëures de bon livel. La premiazion dl cuncors de leteratura per la scoles ladines “Nos tl dialogh intercultural”, unirà tenida n merdi che vën, 19 de mei, dala 10 danmesdì tla scola auta Raetia a Urtijëi. L cuncors per sculeies ie unì metù a jì dala Ntendënza per la scoles ladines deberieda cun l Istitut Pedagogich Ladin, la Union Generela di Ladins dla Dolomites y i trëi Istituc Ladins de San Martin de Tor, Vich y Col de S. Lizia.

USP - Te Sëlva iel unì giaurì locai nueves dl Istitut Culturel Ladin y dla Bibliotech. Dala culaburazion dla istituzions nasc n zënter culturel te Sëlva per dé forza al identità ladina. L assessëur provinziel Florian Mussner y l ambolt Roland Demetz à n sada (9 mei) giaurì ufizialmënter chësta sënta de culaburazion culturela. Te chësta ucajion ie nce unì prejentà la plata internet dla mostra “Viac tla Ladinia”.

USP – La mostra interregiunela 2009 ie unida giaurida ncuei sada (9 mei) tl furtin de Furtëza, dal presidënt dla Provinzia Durnwalder deberieda cun i assessëures ala cultura dla Provinzia de Bulsan, de Trënt y dl Lond Tirol. „N labirint per abiné la lidëza“ chësc ie l pensier zentrel dla mostra che resta davierta nchin ala fin de utober.

USP - Sonn de tambürli, n arald y le oracl - le vedl lëgn , che röia da cuntè la storia dl virus “Syndrome“ che s’à mudé y de sü efe. Incö (9 de mà 2009) nes àl tla introduziun dla festa finala dl concurs online „syndrome 09" acompagné chilò sön la staziun dla ferata de Franzensfeste. Al concurs, laurè fora dal Heimatpflegeverband por l’ann iubilar 09 à tut pert 3500 jogn y jones. Le presidënt dla Provinzia Luis Durnwalder, l’assessuria Sabina Kasslatter Mur, l’assessuria dl Tirol Beate Palfrader y l’assessur dl Trentin Franco Panizza à premié i mius ogadus singui y i mius teams.

USP – Na delegazion de studënc rumanc dai Grijons dla Svizra anconta chisc dis la scola ladina. Tla Cësa provinziela Widmann a Bulsan à l assessëur Mussner y l ntendënt Verra inier juebia (7 mei) prejentà ravises y situazion atuela de nosta scola paritetica.

USP – Te Sëlva à l Istitut Culturel Ladin, l Chemun y la Bibliotech laurà deberieda per crië n zënter culturel. I locai nueves y locai che vën nuzei deberieda vën prejentei n sada ai 9 de mei dala cater domesdì cun la giaurida y n domesdì de porta davierta. L assessëur provinziel Florian Mussner giaurirà deberieda cun l ambolt de Sëlva Roland Demetz chësta prima pert de chël che deventerà l zënter culturel da Nives.