Atualità

USP – Chisc dis ie jites online la plates internet nueves dla Repartizion provinziela per la Cultura y Intendënza ladina. Sota l’adres www.provinzia.bz.it/ntendenza-ladina vëniel prejentà te trëi rujenedes la istituzion cun servijes, proiec y cuntac da pert dla Provinzia de Bulsan per la Cultura y scola ladina. Tres l cialé ora y la partizion nueva vëniel dat truepa nfurmazions che unirà do y do atualisedes.

USP – L plann de nseniamënt, la valutazions y la uneranza per sunadëures jëuni ie stai argumënc prinzipei dl’ancunteda di respunsabli dla defrënta grupes dla Scoles de Mujiga de dut Tirol. L’ancunteda ie chëst ann unida tenida a Sterzing.

USP – Chisc dis vëniel spartì ora tla scoles y scolines ladines l cudejel nuef di cursc de furmazion per nsenianc, educadëures y diretëures. Cun na vela de passa 50 cursc de furmazion persunela y furmazion te duta la materies de scola, vëniel tenì cont di bujëns y dla problematiches atueles. L cudejel ie unì dat ora per l 20° ann ndolauter.

USP – Tla scolina “Surëdl” te Sëlva ie ncuei danmesdì (2 auril) unit adalerch na delegazion de esperc pedagogics per mparé a cunëscer miec la maniera de lauré tla scolines ladines cun trëi rujenedes deberieda. I pedagoghes dala Franzia y dal Deutschland à abù gran stima per l servisc che l ti vën pità ai mëndri dla valedes ladines.

USP – Te si prima senteda à Cunsulta ladina nueva ncuei domesdì (prim auril) udù dant manieres per smendrì la burocrazia ala lies cultureles tla valedes Ladines. “Chëi che se dà ju per la cultura ladina y fej ulentariat ne possa nia mo unì ciariei cun truep lëur burocratich, sën ie unì l mumënt de fé zeche per smendrì burocrazia” à dit l assessëur provinziel ladin Florian Mussner.

USP – N juebia (2 auril) unirà na delegazion l’urganisazion "Pestalozzi - Fröbel" dal Deutschland y dala Franzia a vijité la scolines ladines cun trëi rujenedes. N se aspieta feter 30 persones danter educadëures de scolines y d’autra espertes y esperc de pedagogia infantila. Sun l program dl di iel na vijità ala scolina de Sëlva sciche ejëmpl per la 17 scolines ladines.

USP – Cater scoles autes à laurà cater ani tl proiet europeich d’ert “Women in art”. N juebia 2 de auril uniral giaurì na mostra de chësc proiet tl Zënter per ert y cultura a Urtijëi. Te “Women in art” se tratela dla maniera de esprescion creativa y d’ert dl’ëila.

USP – Ntan la prima ëures de ncuei lunesc (30 merz) ie sun la streda de Gherdëina danter Runcadic y Puntives unì ju sasc. Per garantì la segurëza à la streda messù unì sareda nchin da duman. I respunsabli dla Provinzia à danmesdì inò pudù giaurì l stradon de Gherdëina.

USP – L Istitut per furmazion musichela de rujeneda tudëscia y ladina, à da chëst ena n’aministrazion nueva de nuef persones. Te si senteda de n lunesc (23. merz) à la Jonta provinziela numinà da nuef i trëi revisores di conc.

USP – La prima tlas “A” dla Scola auta per l soziel a Persenon y na grupa dla Val Venuesta à venciù la segonda pert dl cuncors online “Syndrome09”. Danter chëi che ncuei (24 merz) pudù pië do l pest dal assessëura Sabina Kasslatter Mur a Persenon, iel nce sies sculees ladines.