Atualità

USP – Sun l di, avisa 65 ani do la sotscrizion dl Tratat de Paris à la Jonta provinziela de Bulsan (NCUEI) ai 5 de setëmber sëurandat l’uneranzes de merit tl Ciastel Tirol. Nuef sustenidëures dl Südtirol à pudù pië do la uneranza y per l segondo iede iel nce unì sëurandat l pest dla mendranzes che à giapà la Union federalistica dla grupes etniches europees (FUEV).

USP - La nuviteies dl ann de scola nuef y l valor dla mujiga tl’educazion sarà chëst ann i argumënc zentrei tl Di dla Scola Ladina ai 9 de setëmber tl’università a Persenon. Danora prejenterà presidënt dla Provinzia, l assessëur ladin y l ntendënt ladin la nuviteies aministratives. Dopro saral da audì n referat sun l valor dla mujiga tl’educazion.

USP – Ti proscimi dis uniral sun ncëria dl Ufize provinziel per i parcs naturei y l Ispetorat furestel de Persenon scumëncia lëures per mëter a post i troies sun Resciesa, tl parch naturel Puez – Odles. I lëures ie unic azetei dal cunsëi de aministrazion dl parch naturel.

USP – Tla passa 1000 desgrazies ann per ann sun la stredes dl Südtirol ie la persona che va a pe daniëura la pert plu dëibla. Tl’Assessorat ai lëures publics se an dat ju cun chësta problematica y à laurà ora na campania de sensibilisazion dal titul “SOS Zebra” y criteries de cie che l’aministrazions dëssa tò n cunsciderazion a fé la strisces zebra. L proiet de culaburazion danter Assessorat provinziel, chemuns, scoles y assoziazions de jënt de tëmp ie unì prejentà (NCUEI) ai 31 de agost a Bulsan.

USP – La furmazion y la scoles vën tla valedes ladines finanziedes dala Provinzia de Bulsan tres de plu canai: i nsenianc depënd dala cumpëida de iscrizions, la frabiches vën fates aldò dl bujën y l’atività vën finanzieda aldò de plu criteries. La basa de tratatives per finanziamenc y l pëis che la populazion ladina giapa depënd n majera pert dal pruporz. D’autonn unirà la proporzion dla trëi grupes de rujeneda cumpededa ora da nuef. I zitadins puderà se detlaré anonimamënter pra si grupa de rujeneda.

USP – Na streda daujin a prei de Armentara, l cantier sun Jëuf de Sela y stredes per ruvé permez a luesc da paur tl chemun da Ciastel ie stai i proiec che reverda l raion ladin, tratei n merdi, 30 de agost, dala Segonda cumiscion provinziela per la defendura dla cuntreda. Chisc trëi proiec ie unic azetei cun vel cundizion.

USP – N juebia ai prim de setëmber scumëncia n tëmp nuef tla politica soziela dla Provinzia de Bulsan: la prestazions y la tarifes unirà calculedes sun basa dla detlarazion unificheda de davani y avëi (DURP/EEVE). Cun chësc sistem nuef vëniel n iede scumencià tl ciamp saniter y soziel. Per scumencé a lauré cun l sistem nuef zënza dificulteies iel ti mënsc passei unì nsenià ju 430 culabuadërues de servijes soziei y saniteres, partonac y ufizies de assistënza fischela.

USP - Ncuei te n mëns, ai 30 de setëmber uniral tenì l Di dla Cultura Ladina. L’edizion da chëst ann pieta ucajion de se dé ju cun la fazion dla cumpededa dla jënt da una pert y mët dal’autra pert l pruporz sun mëisa de descuscion. L Di dla Cultura Ladina unirà chëst ann tenì tl palaz Widmann a Bulsan.

USP – La manovra finanziera che vën chisc dis trateda tl Parlamënt a Roma ie nce stat l argurmënt prinzipel dla prima senteda dla Jonta provinziela do la paussa da instà, (NCUEI) ai 29 de agost. N cont de dezijions aministratives se damanden che vënie respeteda l’Autonomia, n cont de paiamënc a Roma tënien sun l’Acurdanza de Milan. Contra la liberalisazion di orars dla butëighes, uelen de dumënia tenì la butëighes stlutes. Per schivé pruzesc an adatà l regulamënt dla fuera. La Jonta se à damandà na relazion dala SEL per stlarì l cajo Rainer.

USP – Per avëi na vijion tlera dla partezipazions che l diretëur dla SEL Maximilian Rainer dëssa avëi, se damanda la Jonta provinziela dala SEL na relazion a puntin. “Sciche patrons de maiuranza dla SEL ulons savëi co che la stà” à dit l presidënt dla Provinzia Luis Durnwalder (NCUEI) ai 29 de agost do la senteda dla Jonta provinziela.