Atualità

USP – I sculeies de Sëlva ie ncuei (24 merz) sun Plan de Gralba per n di dedicà ala segurëza sun la nëif. Deberieda cun de plu lies y istituzions vëniel nsenià ai mëndri ciuni che ie i periculi dl sport sun la nëif y co che n possa i astilé ora. L assessëur Florian Mussner sorissea la mpurtanza de chësc di de nseniamënt che vën metù a jì per l prim iede.

USP – Do che la streda dla Mendula ie chësc inviern unì sareda plu iedesc per la truepa nëif, unirala per l 3 de auril inò giaurì per dut l di. Per la furnadoia sun scines iel bel anjeniei doi vagons nueves. Chësc ie unì fat al savëi ncuei (24 merz) a Bulsan te n ancunteda di assessëures provinziei Florian Mussner y Thomas Widmann cun i pendolares.

USP – La Jonta provinziela de Bulsan à ncuei (23 merz) anjenià la lege finanziaria per l ann 2009. Per l Südtirol uniral te curt tëmp njenià na lege n cont dl’aumënt de cubatura pra la cëses privates. Chisc ie stai ponc prinzipei che l presidënt Drunwalder à prejentà do la senteda dla Jonta provinziela.

USP – 180 sculeies da caranta scoles de rujeneda tudëscia, taliana y ladina à fat pea l cuncors de furmazion politica 2009. I prims de uni categuria puderà fé pea la finela a livel dl Tirol, ai prims de auril a Dispruch. Matthias Vinatzer ie terzo tla categuria per scoles de rujeneda ladina y taliana.

USP – La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins. Ncuei (18 merz) à la cumiscion abù si prima ancunteda per se anjenië ca. L cuncors per artisc’ ladins ie chëst ann nce unì giaurì a artisc’ dla valedes ladines dl’autra doi provinzies.

USP – Tl ann 2008 ie feter 80 % di candidac di luesc ladins passei i ejams de rujeneda. La media provinziela ie aldò dl Istitut per Statistica Astat de 50,9% che ie passei l ejam. De ndut iel stat de plu candidac che ie passei l ejam de bi- y trilinguism permez al ann dant. Me tl livel plu bas, l livel “D” iel stat de manco che ie passei.

USP – I nsenianc dla scoles ladines ne à ncuei (mierculdi 18 merz) nia fat pea l scioper. I sindacac AGB-CGIL ova cherdà a n scioper a livel naziunel contra l guviern Berlusconi. Tla scoles tudësces ne iel nianca stat 5% di nsenianc che a fat pea l scioper.

USP – N mer de culëures possen se aspité ti verzons dl Ciastel Trauttmansdorff che gëura ai prim de auril. Chëst ann iel unì sentà ora 250.000 plantes che flëur abenëura.

USP – L Vizekanzler dl’Austria Josef Pröll ie ncuei (17 merz) stat tlermënter a una per l Tunel dl Prëner canche l à ancuntà l presidënt dla Provinzia Durnwalder a Viena. L ie nce unì rujenà dl recunescimënt di tituli de studi y dl bujën de culaburazion a Brüssel.

USP – L miuramënt dla ferata dl Prëner y l finanziamënt aldò ie ncuei stai zënter dl’ancunteda danter l Presidënt dla Provinzia Luis Drunwalder y l Kanzler austriach Werner Faymann, ncuei (17 merz) a Viena. Sëuraprò iel nce unì rujenà dl svilup te Südtirol, la Cunvenzion dl’Elpes y la recunescënza di tituli de studi.