Atualità

USP – La Jonta provinziela à ncuei (15 dezëmber) slungià la ncëria dl ntendënt ala scoles ladines Roland Verra. La crëta ti ie unida data per i proscimi cin ani.

USP – La ustaries y hotiei messerà adaté la njinies contra l meldefuech nchin ala fin de juni. Chësc à la Jonta provinziela de Bulsan fat ora ncuei, 15 de dezëmber. Danter la dezijions che l presidënt Durnwalder à prejentà do la senteda iel nce l program de cuatieres per la families cun davani mesan y la direzion de mujiga tla Scola d’Ert a Urtijëi. Ncuei iel stat l’ultima senteda dla vedla jonta provinziela.

USP – L Museum Ladin a San Martin de Tor gëura inò n S. Stefun, ai 26 de dezëmber y resta ntan la festes uni di daviert. Do la paussa da d’autonn sarà l museum inò daviert nchin da d’autonn che vën.

USP – Tla sënta dla Repartizion provinziela per la Scola y Cultura ladina a Bulsan unirà duman merdi, 16 dezëmber, giaurì la mostra di sculeies dla Scola d’Ert de Urtijëi dedicheda a Leonardo da Vinci.

USP – La Provinzia de Bulsan dà ora uni ann da 100 nchin a 150 cuntribuc per curé la cultura ladina. Aldo dla lege muessel nce unì fat cuntroi sce la lies, grupes y istituzions à adurvà i scioldi sciche detlarà. Plu avisa uniral cialà do l 6 % di cuntribuc paiei ora ti ani 2007 y 2008, chisc unirà trai ora a cajo ai 17 de dezëmber 2008.

USP – A Urtijëi se à ncuei ancuntà duta la educadësses dla scolines ladines dla Provinzia de Bulsan per n di de urientamënt y barat. Danmesdì iel unì purtà dant la fundamënta di urientamënc per la scolines y domesdì à la educadësses prejentà l material didatich laurà ora nstës te la singula scolines.

USP – La Cunsulta culturela ladina se à ncuei (10 dezëmber) ancuntà a Bulsan per to tres l’ultima dumandes de cuntribuc per l ann 2008. Te si ultima senteda à la cunsulta mo cialà de reviers co che ie unì sustenì la cultura ladina ntan chësc ann. Cun la legislatura nueva dl’Aministrazion provinziela uniral nce metù su na Cunsulta culturela nueva. De ndut iel tres l Assessorat provinziel ladin unì dat ora cuntribuc per 1.200.000 Euro.

USP - L Assessorat provinziel ala stredes fej al savëi che nsnuet dala 7 da sëira vën sarei i jëufs de Frea y Pordoi. Chësc ie debujën per la truepa nëif che ie unida ncuei.

USP – Te si ultima senteda di servijes provinziei per l ambient iel unì dat pro la nfrastrutures per la uties sun Resciesa tl Chemun de Urtijëi.

USP – L assessëur ai lëures publics Florian Mussner à ncuei 10 de dezëmber sëurandà ufizialmënter i lëures per fé l furnel nuef dal refudam a Bulsan. Chësc furnel ie un di majeri lëures dl Guviern provinziel y dessegur la miëura soluzion per de plu ani, à sorissà Mussner.