Atualità

USP – I lëures per seguré l parëi sëura l stradon de Gherdëina a Puntives va inant drët bën. L’ena passeda ie unì ju de majeri purons sun streda, sën iel bel unì rumà ju 700 metri cubich de material melsegur. L stradon de Gherdëina, riesc do Puntives de viers de Tluses, resta sarà y puderà bonamënter permò unì giaurì per l fin dl’ena.

USP – Do che tla nuet danter vënderdi y sada iel unì ju sasc, resta l stradon de Gherdëina a Puntives, de viers de Tluses, sarà. L Servisc provinziel per la stredes fej dut l puscibl per seguré la streda. Duman, merdi ai 18 tulerà i geologs dla Provinzia na dezijion deberieda cun i respunsabli dl Servisc ala stredes, per giaurì la streda.

USP – La dezijion de se maridé o no, vën tëuta aldò de plu rejons. La dumanda mpurtanta do la cunseguënzes giuridiches vën suvënz nia cunscidreda. Pra la cunferënza metuda a jì dala Ufize provinziel per l’ëiles ai 20 de nuvëmber, vëniel dat resposta a chësta dumanda. Duc i nteressei ie nviei.

USP – L Guviern provinziel dat pro de lecurdé ai 6 de dezëmber l di nternaziunel dl ulentariat. Danter i unerei saral nce doi reprejentanc dla Val Badia. Tla senteda da ncuei, 17 de nuvëmber à i assessëures nce dat pro cuntribuc per scolines y refezions, la puscibltà de barac scolastics tla provinzia, y che al cëses de paussa ne possa nia auzé i priejes.

USP – Se nuzan dl’ega dla plueia possen sparanië truepa ega da bever y scioldi. Co che n possa nuzé l miec l’ega de plueia y co che n la mët da na pert, iel sën dal cialé do te n cudejel dat ora da esperc dl Ufize provinziel per stravardé l’eghes.

USP – L liber per mëndri dal titul "Miteinander - Insieme - Deboriada" ie unì prejentà ncuei (13 de nuvëmber) a Bulsan. L liber cun doi CD dëssa ti judé a se giaurì y se ntënder miec danter la grupes de rujeneda da pitl insù. L material didatich per mëndri nchin a diesc ani ie unì dat ora tres na culaburazion di trëi Istituc Pedagogics.

USP – L Presidënt dla Provinzia Luis Drunwalder se à ncuei (13 de nuvëmber) ancuntà cun reprejentanc de rujeneda ladina per audì si prupostes n cont de furmazion y program per l Guviern provinziel nuef. L ie unì rujenà dl ruvé permez da pert di Ladins a ncëries, dl svilup dl nfurmazion ladina y dla nfrastrutures tla valedes ladines.

USP – La rujeneda possa unì arichida tres opres letereres. Chësc vën a se l dé tres l cuncors de leteratura ladina metù a jì dal Assessorat ladin dla Provinzia de Bulsan. N sada 22 de nuvëmber uniral premià i autores che à venciù chëst ann y prejentà la publicazion cun si opres letereres.

USP - La segonda Cumiscion per la defendura dla cuntreda à dat pro de fé na streda per ruvé permez a n raion abitativ nuef a La Val. Chësc ie unì fat ora n mierculdi, 12 nuvëmber a Bulsan.

USP – La trëi scoles autes a Urtijëi gëura n vënderdi ai 14 de nuvëmber si portes a duc i nteressei. L ie l prim iede che la Scola d’Ert, l Istitut Raetia y la Scola Prufesciunela prejënta deberieda si strutura y si atività. La sënta nueva dl Istitut Raetia y dla Scola Prufesciunela ie permò unida giaurida dan doi mënsc.