Atualità

USP – Ti chemuns de Gherdëina y dla Val Badia an finà de cumpedé la stimes dla veles provinzieles. Tulan ca la media di 8 chemuns arjonj la Svp tla doi valedes l 63,6 percënt dla stimes. La segonda majera cumpëida ti ot chemuns ladins à la Lista Ladins Dolomites cun 18,8 percënt. Terzo partit tla doi valedes ie i Freiheitlichen cun l 6,9 percënt. Tan de reprejentanc che uni grupa giapa tl Cunsëi provinziel nuef savran permò canche l ie unì cumpedà ora la zedules de vela te duta la Provinzia de Bulsan.

USP – Ti Chemuns de Gherdëina y dla Val Badia an dala 12.00 finà de cumpedé ora la zedules de vela. Dala 7 da duman an tla sezions di chemuns scumencià a cumpedé.

USP- De ndut ie 313.867 persones jites a lité l Cunsëi Provinziel nuef, chësc ie l 80,1 percënt di 387.796 cherdei a lité. Permez al’ultima veles provinzieles tl ann 2003 ie stat 2,3 percënt de manco che ie jic a lité. Te Gherdëina à lità l 82,5%, tla Val Badia iesen stai plu lezitënc arjunjan l 83,5%.

USP – N dumënia 26 de utober ie 387 zitadins cherdei a lité da nuef l Cunsëi provinziel de Bulsan per i proscimi cin ani. Tla doi valedes ladines, Gherdëina y Badia, iel 15.070 litadëures. L vën lità n dumënia nchin ala 10 da sëira. La zedules unirà cumpededes l lunesc dala 7 da duman inant.

USP –Passa 387.000 litadëures tulerà n dumënia 26 de utober na decijion sun la cumposizion dl Cunsëi Provinziel nuef. L Presidënt dla Provinzia de Bulsan cherda ala veles: adurvëde vosc dërt de vela y dajëde testemunianza dl spirt democratich che caraterisea la populazion dla Provinzia de Bulsan. L Presidënt scrij:

USP – Miuré la forza de compra y seguré la stieres ie i obietives che i sindacac y la Provinzia de Bulsan uel arjonjer per ti tenì permez ala cunseguënzes dla crisa finanziera. Ncuei (22 de utober) se à ancuntà reprejentanc de cater sindacac y l Presidënt dla Provinzia de Bulsan.

USP – Nia plu 80 ma 100 Euro al mëns paia la Provinzia per la families. L cuntribut auzà de n chert ie un di pruvedimënc dla Jonta provinziela per dé plu forza de compra, y ie unì publicà tla gazëta ufiziela dla region. L regulamënt va n drova ai 29 de utober, ma davia che l dipartimënt provinziel per l soziel à bele laurà danora, possa i cuntribuc auzei per mutons bele unì paiei ora per l mëns de utober.

USP – L Guviern provinziel de Bulsan à dat pro la terza pert di cuntribuc da chëst ann per sustenì la cultura ladina. Te chëst capitul iel scioldi per ativiteies cultureles y nvestimënc de lies cultureles. Chëst ann à l Assessorat Ladin de ndut bel pudù sustenì lies, artisc’ y aministrazions publiches cun 1.121.600 Euro.

USP – La Jonta provinziela de Bulsan à numinà la nueva cunsulta provinziela di jëuni y dla jëunes per la grupa de rujeneda ladina, che resterà nchin al 2011. La dëssa purté dant prupostes al guviern provinziel n cont dl lëur per y cun la junëza, ndicazions per l plann anuel provinziel, per leges nueves, cuntribuc y nrescides sun jëuni y jëunes y cuestions de mpurtanza per la junëza.

USP – N dumënia 26 de utober vën lità l Cunsëi provinziel nuef. Duta la nfurmazions de chi che possa lité, i orars can che n possa lité y i documënc che n muessa tò pea, vën prejentei tres n video tl internet.