Program dl De
Ai 5 de setëmber dl 2021 sarál 75 agn da canche al é gnü stlüt jö le Tratat de pesc de Paris. Inlaota â i Ministri di afars cun l'ester dl'Austria y dla Talia, Karl Gruber y Alcide De Gasperi, metü la fondamënta por l'autonomia dl Südtirol cun le Tratat Gruber-De -Gasperi. En gaujiun de chësc aniversar unse la poscibilité da se conzentré sön la storia movimentada dl Südtirol y da onoré la realisaziun pratica dl'autonomia.
Öna dles porsones plü importantes dla storia dl'autonomia dl Südtirol é stada Silvius Magnago (1914-2010). Le iurist y politich é sté a ce dl'aministraziun provinziala sciöche presidënt dla Provinzia dal 1960 al 1989 y vëgn odü sciöche pere dl'autonomia dl Südtirol. La plaza dan le Consëi provinzial y le palaz provinzial 1, olache al é la sënta dla Junta provinziala, porta en so onur l'inom de Silvius Magnago.L'ultim iade che al é gnü strotoré danü la plaza él gnü sö l'idea da realisé n percurs storich por descedé l'atenziun por la storia dl'autonomia dl Südtirol y ince por döta l’ativité politica de Magnago y sü compagns de batalia. Nü corones cöcenes slominëntes metüdes sö öna dlungia l’atra dl lunch dla plaza informëia sön l'autonomia de nosta provinzia.
Percurs sön l'autonomia
Sön chësc percurs él da ciafé döta na ligna de informaziuns y imajes interessantes che se referësc al'autonomia y vá dala porsona de Magnago instës tres la storia dl Südtirol dl 20ejim secul cina a tematiches d'atualité. Na diejima corona él tl parch dla cité dailó dlungia denominé do Alcide Berloffa, n om de politica talian che á ince porté pro te na gran mosöra a cherié y realisé l'autonomia dl Südtirol. La corona tl parch Berloffa completëia le percurs y simbolisëia te na certa manira che le coraje, che jô sovënz debojëgn, da jí ite te n compromis por le svilup dl'autonomia, messâ gní da trames les perts. En le De dl'autonomia da chësc ann, ai 5 de setëmber dl 2021, gnarál inauguré cun na zerimonia le percurs sön l'autonomia dal titul "Nos y l'autonomia. En recort de Silvius Magnago".
De dl'autonomia ai 5 de setëmber
Porvia dla pandemia podarán ma tó pert ala manifestaziun cun invit. Mo le percurs sará spo davert tl dagní a dötes les porsones interessades. En gaujiun dla manifestaziun tolará la parora rapresentanc y rapresentantes dles istituziuns politiches dl Südtirol, compagns de iade de Magnago y ince porsones en rapresentanza dla Consulta provinziala dla jonëza ladina, todëscia y taliana. Ala zerimonia sön la plaza Silvius Magnago sarál presënc sciöche ghesć d'onur Romano Prodi, Presidënt da n iade dl Consëi di ministri dla Republica taliana y Heinz Fischer, Presidënt da n iade dla Republica austriaca. An podará ti ciaré online ala manifestaziun por le De dl'autonomia 2021 y ince la desćiarié sön internet. An é tl laur da mëte jö n aprofondimënt digital dla mostra sön la plata web dl percurs.
Photo gallery
