Aministraziun | 02.09.2014 | 11:23

Ai 5 de setëmber: La Provinzia deura les portes –"Nosta autonomia é de düć"

En ocajiun dl Dé dl’Autonomia deura la Provinzia sües portes ala jënt te indöt 20 sëntes provinziales te de plü localitês te döt le Südtirol. „Cun chësta scomenciadia orunse ti fà sintì ala jënt dl Südtirol che nosta Autonomia é de düć“, à dit le Presidënt dla Provinzia Arno Kompatscher inier, lönesc al 1. de setëmber, tratan la presentaziun dl Dé dl’Autonomia.

Le 5 de setëmber é n dé particolar por la storia dl Südtriol, deache n chël dé dl ann 1946 vëgnel firmé dal presidënt dl Consëi talian Alcide Degasperi y dal Minister di Èsters austriach Karl Gruber le Tratat de Paris, olache la Talia se tol dant da ti conzede na potesté legislativa y esecutiva regionala autonoma al Südtirol por sconè les mendranzes dl raiun. „Inće sce laôta ne ê chësta acordanza nia gnüda tuta sö cun entusiasm s’àra mostrè cun le passè dl tëmp de importanza fondamentala por le svilup dl’Autonomia y sciöche garanzia de proteziun a livel internazional por le Südtirol y por so status particolar cun n’aministraziun autonoma“, insciö le Presidënt dla Provinzia Arno Kompatscher.

Por chëstes gaujes él important y dërt da recordè chësc dé important cun na scomenciadia particolara: cun le Dé dla Porta daverta dl’Aministraziun publica, dla Junta provinziala y dl Consëi provinzial en vëndres, ai 5 de setëmber. „En chësc dé dauriunse les portes dles sëntes provinziales olache nosta autonomia vëgn aministrada por ti fà sintì ala jënt che al ne se trata nia de n’autonomia di partis, di politics y dles istituziuns, mo de döta la jënt dl Südtirol“, à recordè Kompatscher. Le Dé dl’Autonomia dess inće mostrè sö les competënzes aministratives provinziales che vëgn realisades tres l’autonomia. „Y inće sciöche zirca 3000 dependënć dl’aministraziun provinziala laôra“, insciö Kompatscher.

La scomenciada da pert de Kompatscher y dla Junta Provinziala vëgn sostignida dal Presidënt dl Consëi provinzial Thomas Widmann che inviëia la jënt a vijité inće la Consëi provinzial: „Tl Consëi provinzial él düć che po s’informè sön le tru legislatif de na lege dal mëteman ćina al’aprovaziun finala“, à dit inier (1. de setëmber) le Presidënt dl Consëi provinzial Thomas Widmann tratan la presentaziun. Nosta potesté legislativa, che gonot vëgn conscidrada naturala, é garantida dal’Autonomia y vëgn inće studiada da delegaziuns da döt le monn, insciö Widmann.

Tratan le Dé dla Porta daverta vara da vijité le Consëi provinzial, i Palać provinziai plü importanć de Balsan (cun l’Intendënza ladina), sciöche inće de Maran, Bornech, Porsenù, Schlanders y Neumarkt, dales 13 ales 17 domisdé. Al gnarà organisé n program cun ativitês desvalies, le punt de racioüda zentral sarà la plaza Silvius Magnago, olache i zitadins podarà vijité de plü stands di sorvisc desvalis che vëgn pità dal’aministraziun publica locala. La cornisc musicala vëgn realisada da trëi grups musicai che à davagné le concurs „Upload“ metü a jì tl raiun dl’Euregio. La pert ofiziala de contlujiun metarà man dales 17.30 sön plaza Silvius Magnago cun le Presidënt dla Provinzia Arno Kompatscher y le Presidënt dl Consëi Thomas Widmann. 

Por de plü informaziuns pon inće vijité la plata internet: http://www.provinz.bz.it/de-autonomia/, realisada aposta por chësta ocajiun y che contëgn les informaziuns sön les sëntes davertes sciöche sön le significat dl’Autonomia por le Südtirol.

 

rc

Bildergalerie