Aministraziun | 02.09.2014 | 11:46

Dé dl’Autonomia: Inće la Junta Provinziala fej para

Le Dé dl’Autonomia ai 5 de setëmber ne é nia ma l’ocajiun por podëi vijité les sëntes y i palać provinziai mo en chël dé pon inće incuntè y se confrontè cun le Presidënt dla Provinzia Arno Kompatscher y i rapresentanć dla Junta Provinziala.

Por le pröm iade vëgnel organisé chësc ann le Dé dla Porta Daverta dla Provinzia ai 5 de setëmber, data che recorda la sotescriziun dl Tratat de Paris tl 1946. De plü ofizi y sëntes dla Provinzia dla Junta provinziala y la sënta dl Consëi provinzial dauriarà sües portes ala jënt dales 13 ales 17 domisdé. Sön la plaza Silvius Magnago jaràra da vijité de plü stands y na gran pert dles sëntes dla Provinzia de Balsan, Maran, Porsenù, Bornech, Neumarkt y Schlanders restarà davertes y pitarà programs desvalis d'aorela cörta. N’odüda generala é da ciafè sön la plata internet:  http://www.provinz.bz.it/de-autonomia/.

I rapresentanć dla Junta provinziala fajarà inće para ai 5 de setëmber y sarà presënć dantadöt te „sü“ ofizi. Le Presidënt dla Provinzia Arno Kompatscher podaràn incuntè tl Palaz Widmann, sënta dl Presidënt dla Provinzia, sciöche inće sön la plaza Silvius Magnago, olache al tignarà inće so discurs final dales 17.30.

Le Pröm Vizepresidënt dla Provinzia Christian Tommasini sarà indere dales 15 inant tl Palaz Plaza, via del Ronco 2, olache al é la sënta dla Repartiziun Cultura y formaziun taliana. Tommasini presentarà dailò le raport nü dles ativitês dl proiet „Scripta manent“. Le secundo Vizepresidënt dla Provinzia Richard Theiner sarà dales 13.00 ćina zirca ales 13.45 tl’Agenzia por l’Ambiënt tla strada Amba-Alagi 5 olache al fajarà na vijità ai laboratori por l’analisa de alimentars. Daldô jarà l’assessur Theiner tla Repartiziun Parcs Naturai dl Palaz provinzial 11 tla strada Ritten.  

Dales 14 podaràn incuntè tl Palaz provinzial 7 l’assessur por la cultura y scora todëscia Philipp Achammer, l’assessuria Waltraud Deeg vijitarà tratan le domisdé indere indöt trëi sëntes. Dales 14.30 ales 15.30 sarà l'assessuria tl’Agenzia por la Familia tla secunda alzada dl Palaz provinzial 12, dales 15.30 ales 16.30 tla Repartiziun Personal tl Palaz provinzial 8 tla strada Renon 13 y dales 16.30 inant pro le stand dl’Aministraziun publica sön la Plaza Silvius Magnago.

L’assessur por la scora y cultura ladina Florian Mussner vijitarà tratan le dé de plü ofizi y sëntes. Dales 13 inant sarà l’assessur presënt tla Repartiziun Bëgns culturai tl Palaz Rottenbuch, strada Armando Diaz 8, dales 14 ales 15 por le stand dles Repartiziuns por i Museums y por la Mobilité sön la Plaza Silvius Magango, dales 15 ales 16 jarà l’assessur Mussner ala festa di maturanć tl Intendënza Ladina (Bindergasse 29). Dales 16 inant podaràn incuntè l’assessur tl Palaz provinzial 2, sënta prinzipala dla Repartiziun Sorvisc Strades. Ala fin dl Dé dla Porta daverta sarà l’assessur Mussner presënt dales 17.30 por la pert ofiziala de contlujiun dla manifestaziun.  

L’assessur Arnold Schuler podaràn incuntè ai 5 de setëmber dales 13 ales 15 te so ofize dl Palaz provinzial 6, strada Brenner 6, y daldô saràl sön la Plaza Silvius Magnago. L’assessuria por la sanité Martha Stocker tolarà pert al Dé dla Porta Daverta te süa sënta prinzipala tl Palaz provinzial 12, olache ara se metarà inće a desposiziuns dla jënt por intervistes spontanes.

 

rc