Scora / Cultura | 28.06.2024 | 15:15

Multilingualink: trëi podcast per ladin, talian y tudësch

N lunesc ai 1. de lugio vën Südtirol cuntà sun Radio Rai 1 da studëntes y studënc dla scoles ITE Raetia de Urtijëi, Durst de Persenon y Torricelli de Bulsan.

De gra a n pruiet nterlinguistich danter scoles àn scumencià l ann passà cun Multilingualink. N ucajion dla festa de Rai Radio 3 a Bulsan à la studëntes y i studënc dl Lizeum Scientifich “Torricelli” de Bulsan, dl Istitut Tecnich per l’economia, la grafica y la comunicazion “Durst” de Persenon y dl Istitut Economich “Raetia” de Urtijëi realisà, n cunlaurazion cun Rai Alto Adige, trëi podcast n con’ dla realtà plurilinguala tla provinzia de Bulsan. I podcast ie unii cuordinei da Cristina Faloci, respunsabla dl program “La lingua batte”; i se cunzentrea dantaldut sun la identità linguistica y culturela di jëuni, si vita da uni di dedite y dedora dala scola, y nce sun aspec spezifics dla usanzes y tradizions dl raion che la studëntes y i studënc à sapù da ndividué y ulù prejenté.

“Rengrazie duc chëi che ti ie stac do ai studënc te chësc pruiet de fla scialdi lerch,” da coche à dit l vizepresidënt dla Provinzia Marco Galateo. “La scumenciadiva va ite a puntin tl urizont educatif y furmatif, dedite de chël che ie ue che l se mueve la Scola taliana. Inuvazion, criatività, ueia de fé y mpëni: chëstes ie la pertes prinzipeles che possa ti dé na sburdla, al didancuei, ai jëuni y ala jëunes a ti jì permez al stude dla rujenedes y a i fé nscila deventé zitadins njeniei per ti vester al mond che i aspieta caora”.

I podcast ie unii fai te plu rujenedes propi per respidlé l plu che la va la realtà raiunela. I ie unii tëuc su cun l sustëni prufesciunel de Alessandra Tortosa y dl team de Rai Alto Adige de Bulsan y sarà da audì n lunesc ai 1. de lugio dala 12.25 nchin la 13.00 y dala 13.25 nchin la 14.05 sun la frecuënzes de Rai Radio 1. L ie nce mesun scuté sun tres streaming sun www.raialtoadige.rai.it y de tò ju dala mediateca de Rai Alto Adige. N estrat di podcast unirà dat tres nce sun Rai Radio 3 n dumënia ai 7 de lugio dala 10.45.

L se trata de n pruiet ambiziëus y inuvatif,” à dit l sëurantendënt scolastich Vincenzo Gullotta. “I studënc à laurà deberieda per dut l ann de scola 2023/2024, se cunfruntan y tulan l’ucajion de se cunëscer miec. La finamira fova defati nce nchëla de fé a na maniera che l sautëssa ora na cumunicazion danter i jëuni y la jëunes cun mesuns y mudaliteies duc autramënter da chëles da ie de regula nuzei. Y dantaldut cun n travert deberieda”.

Clican chiló röiun ala verjiun originala dl comunicat stampa por visualisé imajes, documënc o video che taca lapró

an/dl