Aministraziun | 23.09.2024 | 12:30

La Comisciun de terminologia tól indô sö süa ativité de normaziun

I laurs por renforzé n lingaz sigü dal punt de odüda iuridich aladô dl'autonomia é indô gnüs inviá ia de messé – la Comisciun laora deboriada cun repartiziuns y strotöres dla Provinzia

BULSAN (USP). Definí terms iuridics y aministratifs sciöche ince espresciuns tecniches, y tigní ajornada la terminologia iuridica y aministrativa por le Südtirol: chëstes é les inciaries dla Comisciun paritetica de terminologia (Terkom). En vëndres, ai 20 de setëmber él rové adöm te na sentada la Comisciun, istituida dl 1990 sön la basa dles normes de atuaziun dl Statut spezial por la Regiun Trentin-Südtirol, por baié di proiec de normaziun te ciamps desvalis che sará defata da tó tla man.

Dla Terkom atuala metüda sö de ma dl 2024 fejel pert Thomas Mathà sciöche presidënt, Lorenza Pantozzi Lerjefors sciöche vizepresidënta, Gabriele Finelli, Karl Zeller, Francesco Palermo y Esther Happacher. L'Ofize Chestiuns linguistiches á surantut le secretariat dla Comisciun. "La sconanza dles mendranzes linguistiches te n'autonomia che vëgn vita pó ma funzioné, sce chësc vëgn realisé tla medema mosöra te düc i ciamps de vita de nosta sozieté. Les zitadines y i zitadins pó zënzater pretëne n'aministraziun publica y na iurisdiziun che vires aladô de chësc y l'atuëies ince" alza fora le presidënt Mathà. Porchël él da ciaré da tigní alalt na terminologia iuridica y aministrativa tlera y da capí avisa te düc i lingac provinziai.

Cina dl 2012 â la TerKom normé passa 7500 terms dantadöt ti ciamps dl dërt aministratif, dl dërt zivil, dl dërt penal, dl dërt universitar y dl dërt de prozedöra penala. Sce al gnô ciamó inlaota metü a desposiziun dl publich i terms normá sot forma de glossars (publicá tl Boletin Ofizial), ál metü man dl 2002 le tëmp digital cun bistro, la banca dac dl’Eurac. Por mirit dla colaboraziun strënta cun l'Istitut de linguistia aplicada de Eurac Research, é la terminologia normada por le Südtirol da dailó incá a desposiziun de dötes les porsones interessades tl format digital, nia ma tla forma de terms tecnics, mo bëgn ince cun le contest, la definiziun y d'atri detais d'öga che alda lapró.

Clican chiló röiun ala verjiun originala dl comunicat stampa por visualisé imajes, documënc o video che taca lapró

red/ck