Aministraziun | 06.11.2024 | 09:00

Manual dl Südtirol atualisà: da giaté da śën inant

Nfurmazions cumpates sun l’autonomia, l’istituzions y la storia – per l prim iede nce per ladin tla forma stampeda – l Manual dl Südtirol possa ënghe unì cunsultà online y ciarià ju

BULSAN (USP). Nfurmazions cumpates sun la provinzia, si storia y l Statut d’autonomia giaten bele da ani tl Manual dl Südtirol. La publicazion cuntën nfurmazions genereles sun l’autonomia y l’istituzions: Ora che la Costituzion, l’Acurdanza Degasperi-Gruber y l Statut d’autonomia cuntën l Manual nce la cumposizions atueleles dl Cunsëi provinziel, dla Jonta provinziela, dl Cunsëi regiunel y dla Jonta regiunela. N plu à tla publicazion nce la reprejentanzes dl Südtirol a Roma y a Bruxelles si luegia.

L Manual dl Südtirol atualisà ie sën da giaté nce tla forma stampeda ti doi idioms ladins gherdëina y badiot. Dla devulgazion dl pitl liber se cruzia l’Ajentura per la stampa y la comunicazion. La scoles, o respetivamënter si nseniantes y nsenianc, possa nce apusté partides ntieres dl manual per duta na tlas. Oradechël ie l Manual dl Südtirol da giaté y da se tò pea tl palaz provinziel 1, Palais Widmann, (plaza Silvius-Magnago 1, Bulsan) te duta la cater verscions linguistiches. Cherdà ju y cunsultà possa l Manual oradechël nce unì online sota: https://news.provinzia.bz.it/lld/publicaziuns.

red