Scora / Cultura | 15.11.2024 | 14:30

Na delegazion dla Moldavia vijitea la istituzions de furmazion ladines

Delegazion de esperc de furmazion dla Republica dla Moldavia vijità istituzions de furmazion y de nrescida, per se fé n cheder teoretich y pratich tla realtà multilinguala dl ciamp furmatif ladin

BULSAN (OSP) Na delegazion de 18 pedagoghes y pedagogs y espertes y esperc de furmazion y de aministrazion dla Republica dla Moldavia vijità istituzions de furmazion y de nrescida, per se fé n cheder teoretich y pratich tla realtà multilinguala dl ciamp furmatif ladin.

L assessëur per la Furmazion y la Cultura tudëscia Philipp Achammer y l assessëur per la Furmazion y la Cultura ladina Daniel Alfreider à saludà i vijitadëures: “L ie for na legrëza canche delegazions nternaziuneles desmostra nteres a nosta ‚mendranza tla mendranza‘! Nëus ladins son na "Mendranza-Non-Kin-State", na mendranza zënza hinterland y zënza referimënt a n Stat, y l Statut de Autonomia dl 1972 à na funzion y fazion zentrela y basilera tl manejamënt de nosta cuntreda de furmazion,” da coche à sotrissà l vizepresidënt dla Jonta provinziela y assessëur per la Furmazion y la Cultura ladina Daniel Alfreider.

Elisabeth Alber, tuadëura dl Eurac Research Institute for Comparative Federalism, y Marc Röggla, sëurastant dl Center for Autonomy Experience, à fat n cheder dl program de uspitazion. Ala fin iel danter l auter unì rujenà de tematiches coche la fundamëntes iuridiches y l manejamënt di per di dl multililinguism tl ciamp furmatif. Ai 12 de nuvëmber à la delegazion vijità la Repartizion Ladina dla Facultà de Scienzes dla Furmazion dla Università de Bulsan. Ruth Videsott, tuadëura tl ciamp de Rujeneda y plurilinguism te Südtirol, à danter l auter tenì n referat n con’ dla didatica ntegreda dla rujenedes y dla furmazion dla nseniantes y di nsenianc.

N mierculdi ai 13 de nuvëmber à la delegazion vijità la scola elementera y la scolina de Urtijëi. Mathias Stuflesser, diretëur dl’Aministrazion dla furmazion y la cultura ladina, ie jit pea cun la delegazion, nce per ti cunté l cuntest storich te chël che l se à svilupà te Südtirol l sistem paritetich y plurilingual ladin. Tla scola elementera de Urtijëi ie la delegazion unida saludeda dala diretëura Monica Moroder y dala vizediretëura Monika Senoner y à giapà na vijion coche l vën metù n droa tla pratica dl cunzet plurilingual. L’ispetëura dla scolina Genny Ploner à menà la delegazion tres la scolina ladina "Scurcià"“, ulache la delegazion à pudù udëi coche l vën cialà y valurisà la trëi rujenedes de scola ladin, talian y tudësch te n cunzet olistich.

L diretëur de Repartizion Mathias Stuflesser auza ora l valor dla didatica dla rujenedes, coche la vën metuda n droa dala Ntendënza y Cultura ladina: “La didatica linguistica ntegreda ie n mudel che ne n’ie nia mé azetà da duc tla valedes ladines y che porta de bon resultac, ma la ie nce n bon mpuls per d’autra mendranzes. Tla Republica dla Moldavia iel na lingia de mendranzes che ie nteressedes a n barat cun l sistem furmatif ladin.”

red