Scora / Cultura | 03.03.2025 | 13:30

L’Istitut Cultural Micurá de Rü surantol l’archif fotografich Zardini

Al é gnü sotscrit l'acordanza por le trasferimënt dl archif dla storia de Zardini da Cortina d'Ampëz tl Istitut Cultural Micurá de Rü Ladin a San Martin de Tor

BULSAN/BALSAN (LPA). 120 agn de storia y cultura di ladins tles Dolomites te 300 mile fotografies: Valentina Zardini á dé jö le patrimone dl om, le fotograf Stefano Zardini y de sü antenac al Istitut Cultural Ladin Micurá de Rü de San Martin de Tor. "Al se trata de n sëgn concret dla unité y coejiun culturala dl raiun dolomitich-ladin", sotrissëia Daniel Alfreider, vizepresidënt y assessur provinzial ala Formaziun y Cultura ladina: "Le proiet de digitalisaziun, cataloghisaziun y conservaziun dl gran patrimone iconografich dl Archif de fotografies storiches dla familia Zardini de Cortina d'Ampëz á podü gní realisé tres le finanziamënt straordinar dla Provinzia dl Südtirol."

Ai 28 de forá á sotscrit la Presidënta dl Istitut Ladin Micurá de Rü, Lara Moroder, y la proprietara dl Archif Storich, Valentina Zardini, l’acordanza tl Palaz provinzial 1 de Balsan. L’Istitut Ladin á sëgn le compit da curé y cataloghé le material por che al pois ester oget de mostres y publicaziuns te n secundo momënt.

L’Archif Storich Zardini contëgn le laur de trëi generaziuns de fotografs, danter chisc ince na ëra che á documenté la storia y le svilup dla Val d’Ampëz y dla cultura ladina dal 1890 al 2019. Passa 300 mile documënc de fotografia, danter chisc lastres de spidl, films, diapositives y stampes, tuc sö te albums, 20.000 de chi che é bele gnüs digitalisá.

"L'archif fotografich Zardini é tröp deplü co ma la soma de sües perts singoles", sotrissëia le diretur dl Departimënt Formaziun y Cultura ladina, André Comploi: "Sciöche documënt unitar ál n significat che vá cotan sura i milesc i milesc de retrac straordinars fora" Cun chësta surandada ne stravardunse porchël nia ma la memoria dl passé, mo i cheriun ince na risorsciüda de valur por les generaziuns dl dagní y n lian danter passé, presënt y dagní de nosta sozieté y cultura."

Valentina Zardini á detlaré che "chësta acordanza rapresentëia na ocajiun unica por tigní sö la memoria storica y ti dé visibilité a chësc patrimone de gran valüta documentala y identitara. Chësta coleziun á n valur storich demorvëia, che mëss gní stravardé por les generaziuns dl dagní".

red