Scora / Cultura | 10.03.2025 | 09:30

Pension cumplementera per artisć: iscrizion nchin ai 31 de merz

Artisć che ulëssa se damandé na njonta ala pension tres la man publica, muessa avëi paià ite nstësc te n fond per na pension cumplementera y vester scric ite tl Register provinziel dl’artistes.

BULSAN/BALSAN (USP). Artistes y artisc che ulëssa se damandé na njonta ala pension tres la man publica, y che à tl ann 2024 bele paià ite nstësc te n fond per na pension cumplementera almanco 500 euro muessa fé dumanda de iscrizion tl Register provinziel dl’artistes y di artisc nchin ai 31 de merz. La dumanda de iscrizion ie, aldò dla purtenienza a na grupa de rujeneda, da dé ju tl Ufize per la cultura ladina, tudëscia o taliana.

Sce n à adempì chisc doi recuisic possen fé dumanda de n paiamënt de njonta ala pension nchin ai 30 de nuvëmber 2025 pra l’Ajentura per l Svilup soziel y economich (ASWE). La man publica à nchina sën dat 500,00 euro sëuraprò, soma che ie cun l 2025 unida auzeda a 1.000 euro.

L dërt de fé dumanda à artistes y artisc che lëura prufesciunalmënter ti ciamps dl’ert figurativa y dl’ert reprejentativa, dla mujiga, dla leteratura y dl film, che ie dl Südtirol o vif y lëura da almanco doi ani tl Südtirol y che à n davani al ann che ne superea nia i 40.000 euro.

red