Scora / Cultura | 26.03.2025 | 08:15

Deplü sport tles scores elementares ladines dal proscim ann de scora

La junta provinziala tol la dezijiun da aumenté da 34 a 68 ores al ann per ci che reverda les leziuns de educaziun fisica y sport te dötes les scores elementares dles valades ladines

BULSAN/BALSAN (LPA). Dötaorela prevëiga le plann orar dles scores elementares di raiuns ladins 34 ores dla disciplina “Movimënt y sport” te vigni classa, cossa che corespogn a n’ora de leziun al’edema.

La lege statala n. 234 di 30 de dezëmber 2021 á stabilí l’introduziun graduala de döes ores de Educaziun al movimënt tles classes cuarta y cuinta dla scora elementara. L’injunta dles ores de educaziun al movimënt á le fin da promöie ti mituns y tles mitans n comportamënt aladô y stils de vita funzionai a na chersciüda armonica, ala sanité, al bëgnester psicofisich y al svilup complessif dla porsona; l’educaziun al movimënt vëgn ince reconesciüda sciöche n dër stromënt de aprendimënt.

Do che n valgönes scores elementares di raiuns ladins á bele sperimenté por dui agn alalungia l’aumënt dles ores dla materia Movimënt y Sport, él gnü fat fora da aumenté te vigni classa les ores, da 34 a 68 al ann, cossa che corespogn a 2 ores al’edema, mudan insciö la deliberaziun dla Junta Provinziala 1182/2009 (Indicaziuns provinziales por les scores elementares y secondares de pröm degré dles localités ladines).

La mudaziun gnará portada ite a pié ia dal ann de scora 2025/26. Les indicaziuns organisatives y didatiches gnará comunicades tres na zircolara menada fora dala Direziun Provinziala dles Scolines y Scores Ladines, deperpo che i adatamënc di orars edemanai che vá debojëgn sará de competënza dles Direziuns scolastiches y di Consëis de Istitut.

red