Atualità

USP – Per fé viver la Cultura ladina sustën la Provinzia de Bulsan truepa lies, artisc y istituzions. Tl ann 2011 iel tres l Assessorat ladin unì dat cuntribuc per na soma de 1.190.580 euro. Chësc sustëni finanziel ie unì spartì su danter 186 dumandes de cuntribuc valutedes dala Cunsulta provinziela ladina, l finanziamënt per l Istitut Culturel Ladin, produzions de televijion, publicazions, opres artistiches, proiec de educazion y n finanziamënt ala zaita La Usc di Ladins.

USP – Nchin ai 23 de dezëmber 2011 possa nsenianc fé dumanda te ruvé tla graduatories provinzieles dl ann de scola 2012/13 per la scoles ladines. La dumandes muessa unì dates ju ala Ntendënza ladina a Bulsan.

USP - Da n valgügn dis él tla rëi la plata nöia www.wopapa.it/la/wopapa/default.html tres chëra che an po menè ite propostes por la lîta dla "parora" y dla "parolata" dl ann 2011. Dal 2005 incà chir fora ince tl Südtirol na iuria les parores y les parolates dl ann fora dles propostes che é gnüdes menades ite dala popolaziun. La scomenciadia vëgn fata por düc trëi i lingac dla provinzia, todësch, talian y ladin. Al é ince n liam a facebook.

USP – Per nsenianc de religion, ma nce per la pluanies y chëi che lëura tla comunicazion iel unì njenià n Glossar de Religion te trëi rujenedes. La publicazion nueva unirà prejenteda n juebia ai 15 de dezëmber tl Istitut tecnich Retia a Urtijëi.

USP - »Universum«, »Dolomites«, »Laboratorium« ie la trëi pertes de METGEO che unirà prejentedes proscimamënter tla scoles mesanes de Gherdëina y dla Val Badia. METGEO ti dà tla mans ala scoles mesanes n mesum cuncret per pudei mëter ndroa la didatica ntegreda dla rujenedes. Chësta didatica inovativa dla rujenedes pëia aldidancuei bele via tla scolines y dëssa jì inant te duta la scoles.

USP – Persunaliteies dla valedes ladines che se à dat cà per fé viver la cultura ie (NSËIRA) ai 5 de dezëmber unides uneredes dal Assessorat provinziel ladin. Te na pitla festa a La Ila à l assessëur Florian Mussner sëurandat uneranzes a n reprejentant di ulenteres per uni chemun.

USP - Scomenciamënt dl ann scolastich antizipé y fin spostada, edema da cin dis por scolines y scores elementares, da arlungé a sis dis por scores mesanes y altes. Chësta é la pert zentrala dl’acordanza de mascima, che n’é niaciamò definitiva, arjunta tla Junta provinziala sön le calënder scolastich. "Ara se trata de n’intenüda che garantësc sides l’autonomia scolastica che l’armonisaziun dl calënder" à dit le Presidënt dla Provinzia Luis Durnwalder.

USP – En jöbia ai 15 de dezëmber tëgn Hans Karl Peterlini da Balsan n referat dal titul „Fremdsein in Tirol. Eine verquere Geschichte mit europäischen Bezügen“ tla Biblioteca provinziala Teßmann . Al é le secundo referat dla ligna de referac dla Biblioteca provinziala sot le moto „Le Südtirol tl’Europa. Na chirida de fostüs“.

USP - Patrick Stuflesser menerà nce per i proscimi trëi ani la Cunsulta ladina di jëuni. N vënderdi sëira (2 dezëmber) à la Cunsulta nueva tenì si prima senteda cun vela dl presidënt. L assessëur provinziel ladin Mussner à te chësta ucajion tëut su n prim cuntat persunel cun chësc organn consultif per la Jonta provinziela y à cialà inant sun i argumënc de atualità per i jëuni.

USP – I assessëures provinziei ala scola Mussner, Kasslatter Mur y Tommasini à (NCUEI) ai 30 de nuvëmber ancuntà l Cunsëi naziunel dl’Istruzion publica che ti unì n vijita a Bulsan. Te chësta ucajion à i respunsabli de nosta scoles pudù prejenté la situazion particulera y curé i raporc cun i respunsabli a livel naziunel.