Atualità

USP - L Cunsëi provinziel dla scola se à (INIER) ai 16 de jené ancuntà per rujené ora l’unificazion dl calënder de scola. La se tratova de dé ju n bënsté che la Jonta provinziela adrova per pudëi tò na dezijion definitiva. La votazion finela ie jita ora contra la pruposta. Aldò dla descuscion dl Cunsëi provinziel dla scola, che à durà de feter cater ëura, se aspieten mo vel mudazion ala pruposta.

USP – La Jonta provinziela à dat pro i urdenamënc per set studi dl’Università liedia de Bulsan. Danter chisc, iel (NCUEI) ai 16 de jené nce unì azetà la ntroduzion de n studi nuef tl ciamp dla ngenieria de energia.

USP – I sculeies dl Lizeum d’ert cun Scola prufesciunela de Urtijëi à ntan l’ena passeda fat scultures de dlacia per n cuncors metù a jì n culaburazion cun la lia turistica y l chemun. L prim pest à venciù l scultura dl auto VW Käfer. Ai sculeies ti iel cun chësta scumenciadiva unì pità na ucajion particulera de nseniamënt, per l zënter de Urtijëi pieta la scultures na bela atrazion artistica.

USP - Nchin ala fin de jené possa la lies damandé n cuntribut provinziel per judé a finanzië ativiteies tl ciamp dla cultura ladina ntan l 2012. N mierculdi ai 25 de jené vëniel tla Val Badia - y n lunesc ai 30 de jené te Gherdëina - pità n servisc de nfurmazion y aiut per fé la dumandes, ulache n posse nce les de ju.

USP – Nchin ai 20 de jené possen mo dé jù prupostes per l cuiertl de doi libri nueves de leteratura ladina. Per chësta segonda pert dl cuncors “Autëures Ladins Scrij”, scrit ora dal Assessorat provinziel ladin, ie da vëncer de ndut 2.000 euro y de plu libri da crì ora.

USP – Cun la fin dl ann va Theodor Rifesser, l diretëur dl Servisc de Inovazion y consulënza dla Scola Ladina (ex-Istitut Pedagogich Ladin) n pension. La direzion de chësc Servisc passerà cun jené 2012 al ntendënt dla Scola Ladina. L’assessëur provinziel ladin lauda Rifesser per si atività pionieristica sciche prim y ultimo diretëur dl Istitut che à pità material didatich y furmazion ai nsenianc dla scoles ladines.

USP – Na pruposta defin inuvativa pieta l Ciamp per Inovazion dla Scola Ladina (ex- Istitut Pedagogich) per l ann nuef. Na lingia de stories tla cater rujenedes, ladin, tudësch, talian y nglëisc ie unides anjeniedes te n App per pudëi les udëi y audì sun l iPhone y sun l iPad.

USP – La Provinzia de Bulsan sustën l’atività culturela cun truep cuntribuc a lies, scumenciadives y istituzions. Aldò di regulamënc muessel nce unì cialà do plu avisa na cumpëida spezifica di contribuc paiei ora. Per chisc cuntroi iel ai 16 de dezëmber unì trat a sort 6% dla dumandes di cuntribuc paiei ora dl 2010.

USP - Nsenianc de religion, la pluanies y chëi che lëura tla comunicazion possa da moinla se stizé sun n aiut nuef. L Servisc Inuvazion y cunsulënza dla Ntendënza Ladina (ex- Istitut Pedagogich Ladin) à dat ora n Glossar de Religion che ie unì prejentà (NSNUET) ai 15 de dezëmber tl Istitut tecnich Retia a Urtijëi.

USP – Per fé viver la Cultura ladina sustën la Provinzia de Bulsan truepa lies, artisc y istituzions. Tl ann 2011 iel tres l Assessorat ladin unì dat cuntribuc per na soma de 1.190.580 euro. Chësc sustëni finanziel ie unì spartì su danter 186 dumandes de cuntribuc valutedes dala Cunsulta provinziela ladina, l finanziamënt per l Istitut Culturel Ladin, produzions de televijion, publicazions, opres artistiches, proiec de educazion y n finanziamënt ala zaita La Usc di Ladins.