Atualità

USP – A livel aministratif cumporta la spartizion de cumpetënzes danter Chantun y chemuns dificulteies. Per l’aministrazion regiunela vel n prinzip uniter, ntant che i chemuns tën plu cont dla realtà pratica. L assessëur Martin Jäger à rujenà de logiches de maiuranza tla cuestion de rujeneda.

USP – La ntroduzion dla rujeneda standard ie nce per i promotëures nstësc dla Lia Rumantscha jita massa debota jan nia streda nia naturela. L Rumantsch Grischun vën purempò azetà a livel sëura la valedes. De bona esperienzes an nce fat tl svilup de paroles nueves.

USP – Per mparé a cunëscer miec l’esperienza che i ladins-rumatsch à fat te passa 20 ani cun si rujeneda unificheda, se à na delegazion de istituzions ladines ancuntà cun promotëures, l’aministrazion cantonala y reprejentanc locai dla Val Müstair. Cun la vijita ti Grijons à la delegazion (INIER) ai 23 de mei pudù capì miec cie che à funziunà y ciuni che ie stai i majeri fai: dut chësc per pudëi valuté miec la situazion dl Ladin standard per l raion dla Dolomites.

USP - Ncuei ai 21 de mei vëniel dala 10.00 tenì n menut de chiet te duta la scoles dl Südtirol. Cun chësc menut de chiet uel l mond dla scola dé esprescion de solidarietà de viers dla vitimes dl atentat a na scola a Brindisi y cundané uni sort de viulënza.

USP - La 17 scolines ladines à ntan chësc ann laurà ora n prufil pedagogich aldò de chël che possa unì urientà miec l lëur cun y per i pitli mutons y la pitla mutans. Chësc model de urientamënt ie (NCUEI) ai 18 de mei unì purtà dant ai reprejentanc di genitores, ai respunsabli di chemuns y dl sistem furmatif ladin, ma nce a istituzions che lëura deberieda cun la scolines ladines.

USP – Nchin ai 30 de mei iel tl Ufize dla region europea Tirol- Südtirol-Trentin a Bruxelles da udëi lëures de Ivan Lardschneider. La mostra dl scultëur de Sëlva ie unida giaurida n merdi ai 15 de mei.

USP – Per nsenië tla scoles y scolines ladines muessa i nsenianc documenté si cumpetënza linguistica tla rujeneda ladina. Pra l ejam de ladin per nsenianc iel unì mudà la pert scrita che ne sarà nia plu na traduzion ma dumandes a resposta davierta.

USP – Trëi scric premiei dl cuncors de leteratura ladina scrit ora dal Assessorat ala Cultura Ladina plu mo autri trëi pec cris ora dala cumiscion ie unic stampei te n liber. La prejentazion dla stories per jëuni y jëunes, y la premiazion dl cuncors „Autëures Ladins Scrij...“ unirà tenida n vënderdi ai 25 de mei dala 6 da sëira tl local di jëuni Saut a Urtijëi.

USP – Te n mëns, ai 15 de juni uniral tla Furtëza de Franzensfeste giaurì la cuarta edizion dla mostra Panorama, la gran mostra che pieta na sëuravijion dl’ert atuela tl Südtirol. Ala scumenciadiva dla repartizions provinzieles ala cultura dla trëi grupes de rujeneda deberieda cun l Museion fej nce pea de plu artisc’ ladins. I assessëures provinziei ala cultura à (NCUEI) ai 16 de mei prejentà la gran scumenciadiva.

USP – La Jonta provinziela à dat pro la ndicazions provinzieles nueves aldò de chëles che i istituc tecnics economics dla valedes ladines possa anjenië i curricula per la terza, cuarta y cuinta tlas.