Atualità

USP – Tobia Moroder de Urtijëi à venciù l prim pest dl cuncors de leteratura ladina metù a jì dal Assessorat provinziel Ladin. Chëst iede vëniel partì ora de plu pesc’: l segondo pest ie jit a Ruth Videsott y tla categuria di jëuni iel mé unì dat ora n segondo pest che ie jit a Julia Runggaldier. L’opres letereres unirà publichedes y d’ansciuda prejentedes pra na premiazion.

USP - En sabeda al pröm d’otober saràl da aldì por le pröm iade le grup Ganes tla Val Badia. Les chertes por le conzert dales 8 da sëra tla Ciasa de Cultura a La Ila é bele dötes gnüdes venüdes. Chësc desmostra le gran suzès por la scomenciadia dl Istitut Ladin Micurà de Rü, che à orü ti dè l’ocajiun ala jënt ladina de aldì a Ciasa le trio badiot che à portè les Cianties ladines al publich foradecà.

USP – La fazion dla cumpededa dla jënt y dl pruporz che vën a se l dé dala detlarazion de grupa rujeneda ie i doi argumënc zentrei dl Di dla Cultura Ladina. L danmesdì per se dé jù cun chësta tematiches a unirà, n vënderdi ai 30 de setëmber, giaurì cun na ntroduzion dl presidënt dla Provinzia Durnwalder y dl assessëur ladin Mussner.

USP - L ann de scola nuef tla valedes ladines iel unì nvià via (NCUEI) ai 09 de setëmber tl’università a Persenon, cun dl Di dla Scola Ladina tl sëni dla mujiga. Te chësc di de furmazion y ancunteda iel unì jit plu sot al valor dla mujiga tl’educazion. L assessëur provinziel ala scola ladina à fat n apel a de plu culaburazion danter istituzions, scoles y families.

USP - La nuviteies dl ann de scola nuef y l valor dla mujiga tl’educazion sarà chëst ann i argumënc zentrei tl Di dla Scola Ladina ai 9 de setëmber tl’università a Persenon. Danora prejenterà presidënt dla Provinzia, l assessëur ladin y l ntendënt ladin la nuviteies aministratives. Dopro saral da audì n referat sun l valor dla mujiga tl’educazion.

USP – La furmazion y la scoles vën tla valedes ladines finanziedes dala Provinzia de Bulsan tres de plu canai: i nsenianc depënd dala cumpëida de iscrizions, la frabiches vën fates aldò dl bujën y l’atività vën finanzieda aldò de plu criteries. La basa de tratatives per finanziamenc y l pëis che la populazion ladina giapa depënd n majera pert dal pruporz. D’autonn unirà la proporzion dla trëi grupes de rujeneda cumpededa ora da nuef. I zitadins puderà se detlaré anonimamënter pra si grupa de rujeneda.

USP - Ncuei te n mëns, ai 30 de setëmber uniral tenì l Di dla Cultura Ladina. L’edizion da chëst ann pieta ucajion de se dé ju cun la fazion dla cumpededa dla jënt da una pert y mët dal’autra pert l pruporz sun mëisa de descuscion. L Di dla Cultura Ladina unirà chëst ann tenì tl palaz Widmann a Bulsan.

USP – Cun l „Pas culturel“ giapa i cumëmbri ulenteres de lies cultureles l priesc de manifestazions y museums lascià do nchin al 50%. Chisc dis à l Ufize provinziel Cultura ladina mandà ora l „Pas culturel“ nuef che vel doi ani. Sce vel lia culturela ne l ëssa nia giapà, possela se l damandé.

USP – N mer de lingac é le titul dl convëgn por le personal insegnant de lingac che gnarà tignì en lönesc y en dedolönesc ai 29 y 30 d’agost a Balsan. La scomenciadia di trëi Departimënc scolastics y dl’Univesité de Balsan à le fin de portè pro a na vijiun plü ampla dl plurilinguism, mostran sö la potenzialité dla conescënza de de plü lingac.

USP – Passa 200 nsenianc ladins se à ntan chësc instà, ntan si feries, tëut dl’aurela per cursc de furmazion. Chisc ie plu di mec nsenianc dla soles y scolines ladines che à fat i cursc te nosc raion, a Roma o oradecà. L’esperienza dla furmazion y cuntat cun coleghes d’autri raions à dat mutivazion per l ann de scola nuef.