Atualità

USP – A Al Plan de Mareo, La Pli, Rina y San Martin de Tor à l assessëur ladin Florian Mussner ncuei juebia, 13 de mei, vijità la scoles y scolines. La se à dantaldut tratà de rujené cun i diretëures, nesnianc y nce cun i sculeies nstësc sun l sviliup dla scola ladina.

USP – Bele dl 1977 à l cunsëi nternaziunel di museums „ICOM“ numinà per l prim iede l „Di nternaziunel dl Museum“, chëst ann vën chësc di nce valorisà tl Südtirol. N dumënia che vën, ai 16 de mei ie duc i museums provinziei davierc al publich a n priesc simbolich o defin debant. Tl Museum Ladin a San Martin de Tor uniral danter la doi y la sies domesdì purtà dant poejes ladines. L ntreda ie tlo debant.

AST - Pra la vijites ala scoles de Gherdëina à l assessëur ala scola ladina Florian Mussner, ncuei mierculdi, 12 de mei abù ucajion de ancunté sculeies, nsenianc y diretëures te si atività. La ulentà de Mussner ie de avëi n cuntat de persona per udëi miec la situazion y i bujëns dla scoles. L Assessëur cumpanià dal Ntendënt y dal Ispetëur per la scoles ladines, à pudù se fé n cheder dl lëur che vën fat di per di tulan nce a cunescënza i bujëns dla singula strutures. Danter chisc l bujën de na sënta per i servijes ntegrei te Gherdëina.

USP – N mierculdi, juebia y vënderdi jirà l assessëur Florian Mussner a vijitè la scoles ladines dala scolina nchin ala scola auta. Al zënter dla vijites sarà l’ancuntedes cun i nsenianc y diretëures.

USP - Le Museum Ladin Ciastel de Tor presënta ‘n vëndres ai 7 de má 2004 tla calonia de Sëlva la publicaziun „ La scola d’ert de Sëlva Gherdëina – 1908-2003 – 95 ani de storia“.

USP – Sun dumanda dl assessëur ladin Florian Mussner à la Jonta Provinziela da permò dat prò l program per l sustëni dla cultura y dla furmazion per la grupa de rujeneda ladina. Te chësc program iel la spëises per manifestazions cultureles y per njinies, cuntribuc, nvestizions tl ciamp culturel, per l’atività de furmazion y per sustenì artic’.

USP – Cun l slargië dl’Union Europea de viers dl est giapa la scola la ncëria de ti giaurí l’udleda ala generazions nueves de viers dl’Europa. Cun chësta idea tol i trëi assessëueres ala scola, Florian Mussner, Otto Saurer y Luisa Gnecchi posizion sun l zapé ite tl’Union Europea da pert de disesc paejes. Furmazion y scola giapa na funzion zentrela tl ji permez ala barieres cultureles y de rujeneda, nscì la tëuta de posizion.

USP – La Consulta Ladina per i Jëuni à pra si ultima senteda dat l bensté sun l cuntribut per frabiché l zënter nuef per jëuni, ert y cultura a Urtijëi. A una se à l cunsëi de consulënza per cuestions di jëuni ladins nce mustrà per l program de atività y nvestizions.

USP – Tla reunion generela da iner lunesc, 26 de auril, iel ufizialmëter unì sëurandà la ncëria da presidënt dl Cunsëi Scolastich Provinziel a Tiziano Botteselle. L presidënt da dant Siegfried Baur resta vizepresidënt dl Cunsëi deberieda cun Heinrich Videsott per la grupa de rujeneda ladina.

Ncuei, 23 de auril, iel l di mundiel dl liber y dl nseniamënt . Per chësta ucajion publichea l Istitut Provinziel de Statistica (Astat) vel nfurmazions sun l liejer tl Südtirol. Da na nrescida generela dl 2003 ie unì a lum che l’ëiles (64%) liej de plu di ëi (40%). Chëi che liej l plu ie i mutons nchin a 13 ani: l 30% liej passa 10 libri al ann.