Atualità

USP - Tl’Intendënza ladina él sëgn dan man le calënder provisore por i ejams de concurs dles insegnantes y di insegnanc dles scores ladines. “La maiù pert di ejams scric sarà ti dis incër les festes da Pasca” à dit l’ispetur dla scora ladina Lois Ellecosta. Dui ejams gnarà bele tignis ala fin de forà, y plü avisa “Fotografia y grafica publizitara” y “Pitöra”.

USP - Chisc dis mostra Barbara Tavella instalaziuns video y imajes danter realté y finziun tla Galaria Prisma a Balsan. Ara é la pröma artista che à davagné le pest „Flus d’aisciöda“ metü a jì dal Assessorat ala cultura ladina. La mostra é gnüda inaudada tratan le fin dl’edema che é stè dal assessur ladin Florian Mussner, dala presidënta dla Lia di artisc de Südtirol Helga von Aufschnaiter y dal presidënt dla iuria Josef Irsara.

USP - Barbara Tavella, la pröma artista che à davagné le pest „Flus d’aisciöda“, mët fora sües operes tla Galaria Prisma a Balsan. La mostra gnarà inaudada en vëndres sëra, ai 4 de forà 2005 y restarà daverta cina ai 19 de forà.

USP - Sce ara se trata de problems d’amur, conflic cun i geniturs o problems de dependënzes tol les jones y i jogn che é te dificoltês sovënz sö contat cun le zënter de consulënza „Young&Direct“. Chilò poi rajonè de sü problems y de sü fistidi, magari tres telefonn o e-mail, restan anonims, y gnon aconsià da porsones espertes. I assessurs ala cultura Florian Mussner, Sabina Kasslatter Mur y Luigi Cigolla s’à fat na idea dl laûr te chësc zënter inier jöbia, ai 27 de jenà.

USP - Dan da püch à la Junta provinziala sön domanda dl assessur ladin Florian Mussner aprovè le plann anual por le sostëgn ala cultura dl grup linguistich ladin por l’ann 2005. Chilò ne tómel nia ma ite i contribuc por manifestaziuns, por la promoziun dla mendranza linguistica y por la colaboraziun cun i Grijuns, mo ince i contribuc ai artisc, ales lies y ai media sciöche ince i contribuc por investiziuns tl ciamp cultural.

OSP – “I messun recordè, tignì i edli daverc y agì cun cosciënza y responsabilité, por che de te’ tragedies ne sozedes nia ciamò n iade”, à sotligné i trëi assessurs ala scora Otto Saurer, Luisa Gnecchi y Florian Mussner en gaujiun dl 60ejim aniversar dla liberaziun dl ciamp de conzentramënt de Auschwitz che toma doman, ai 27 de jenà 2005. En chësc dé vëgnel recordè les vitimes dl nazism.

USP - Tles prömes trëi tlasses dles scores elementares ladines déssel gnì injuntè ales 26 ores d’oblianza al’edema atuales trëi ores de materies a lîta. Tla cuarta y cuinta tlassa dla scora elementara dess les scolares y i scolars avëi 27 ores d’oblianza al’edema y trëi ores de materies a lîta. Tles scores mesanes ladines déssel indöt gnì pité 32 ores d’insegnamënt de 60 menüc; chësc corespogn a 35 unitês da 50 menüc da sëgn y trëi unitês de materies a lîta. La Junta provinziala à aprovè incö, lönesc, sön domanda dl Assessur ladin Florian Mussner chëstes normes diretives por realisé la reforma dla scora .

USP – Sëgn sa les scolares y i scolars de cuinta tlassa dla scora alta co s’arjigné ca plü avisa ai ejams de maturité. Adöm al Ministêr dl’istruziun à l’Intendënza Ladina fat fora les materies che sarà oget dla secunda proa scrita pro i ejams de maturité dl ann de scora 2004/2005.

USP - La direziun dla scolina “Ladinia” lascia al savëi che le referat dl professur Wassilios Fthenakis sön le program por i 20 de jenà 2005 a S. Cristina vëgn spostè ai 17 de merz 2005.

USP - Les repartiziuns ala cultura dla Provinzia lascia alsavëi che la scomenciadia „Kulturpass“ va inant ince tl ann 2005. En chësc iade ne mëssel nia plü gnì fat na domanda aposta por ciafè le „Kulturpass“ nü. Chësc ti gnarà menè tl mëis de merz 2005 a vigni uniun che à le dërt de l’avëi. Al vel dal 1 d’aurì 2005 inant, por dui agn alalungia. Le „Kulturpass“ atual vel ciamò cina ai 31 de merz 2005.