Atualità

USP - Por le mëteman dl ann de scora nü gnaràl ince en chësc ann invié ia en vëndres, ai 9 de setëmber 2005 le Dé dla scora ladina a La Ila. I argomënc zentrai che gnarà tratà te chësta ocajiun é la scora ladina y sües particolaritês sciöche ince le percurs de formaziun y la cualité dla formaziun a livel nazional y internazional. Implü él ince sön le program n discurs da pert dl assessur por la scora Florian Mussner y dl intendënt Roland Verra.

USP - L’Istitut Cultural Ladin “Micurà de Rü” se dà jö cun le mantegnimënt y la promoziun dl lingaz y dla cultura ladina. Tignin cunt dles propostes dles assoziaziuns culturales de Gherdëna y dla Val Badia à la Junta provinziala nominé, en lönesc ai 29 d’agost 2005, le Consëi d’Istitut nü dl Istitut Cultural Ladin “Micurà de Rü”. “L’Istitut à na funziun determinanta no ma por le mantegnimënt mo ince por le svilup de nosta cultura ladina” à dit l’assessur Mussner.

USP - En lünesc, ai 29 d’agost 2005 à la Junta provinziala sön domanda dl assessur Florian Mussner nominé danü la Consulta provinziala dla jonëza ladina metüda adöm da diesc comëmbri. “La Consulta resta trëi agn te süa inciaria y ara à le compit de rapresentè i interesc dla jonëza ladina a livel provinzial” à alzè fora l’assessur Mussner che à sambëgn ince tut l’ocajiun por rengrazié la Consulta da denant por l’impëgn y la colaboraziun tratan i trëi agn passà y ti à aodè tröp suzès te so laûr al gremium nü.

USP - “Identité, profescionalité y svilup“, insciö à inom le convëgn che vëgn invié ia ai 6 de setëmber 2005 te Sëlva. Danter atri sarà presënc le presidënt dla Provinzia Luis Durnwalder, so colegh dal Trentin Lorenzo Dellai, l’assessur Florian Mussner y l’assessur dla Regiun Veneto Oscar De Bona.

Ai 11 d’agost 2005 dales 9.00 inant gnaràl assegné tl’Intendënza ladina, Bindergasse 29, a Balsan i posc de rode y lëdi por l’insegnamënt tles scores ladines tratan l’ann de scora 2005/2006.

L’Intendënza dla scora ladina à inier mertesc, ai 12 de lugio 2005 lascè alsavëi i resultac di ejams de stat 2005 tles scores altes ladines. Ma un n candidat à arjunt le mascimo resultat.

USP - Les gradatöres provisores por les inciaries de direturia o de diretur tles scores elementares, mesanes y altes ladines por l’ann de scora 2005/2006 é gnüdes publicades inier lönesc, ai 4 de lugio tla Intendënza ladina a Balsan.

USP - Inier lönesc, ai 4 de lugio 2005 à Eva Maria Ziegler, consula generala austriaca a Milan incuntè l’assessur Mussner. Danter ater à i dui rajonè dla situaziun atuala di ladins, dla cultura ladina y dl barat cultural cun l’Austria.

Chi che a n’antëna cun satelit po ti ciarè en mercui, ai 6 de lugio al film „ Reisewege: Im Herzen der Dolomiten. Die Ladiner in Südtirol“. L’introduziun al argomënt é gnüda realisada cun la partezipaziun dl Museum Ladin.

Ti mëisc da d’isté, tratan che i geniturs vijitëia pazificamënter le Museum Ladin Ciastel de Tor a San Martin de Tor po les mitans y i mituns imparè a conësce le Museum te na manira plü adatada a ëi. La pröma vijita organisada por families tl Museum Ladin gnarà tignida en jöbia, ai 7 de lugio.