Atualità

USP - Sot ala presidënza dl assessur Florian Mussner él gnü tignì l’edema che é stada döes sentades dla Consulta por la cultura ladina dla Provinzia a Corvara. Le punt plü important sön l’ordinn dl dé ê le tratamënt de presciapüch 120 domandes de porsones che laora tl ciamp dla cultura. Al é gnü spôrt n contribut de 720.000 euro.

L’intendënt dles scores ladines Roland Verra à dan da püch nominé i presidënc y i comëmbri dles comisciuns d’ejam por i ejams de stat finai tles scores altes ladines por l’ann de scora 2004/2005. Tles scores altes ladines tla Val Badia y te Gherdëna se presentaràl indöt 39 candidates y candidac ai ejams statai, de chisc dui da privatisc.

USP - Tratan la pröma sëra de seleziun pro le “Festival da Chors” tignida en domënia, ai 10 d’aurì 2005 a Rueun tla Svizra rumancia à le cor dles ëres “Raiëta” da La Val albü n gran suzès. L’assessur ladin Florian Mussner che ê a Rueun cun la delegaziun ladina de Südtirol à podü ti fà sües mius congratulaziuns ales bones ciantarines da La Val.

USP - La scola ladina sperimenterà n l ann de scola che vën 2005/06 la reforma scolastica. L Assessëur per la scoles ladines Florian Mussner, l Intendënt dla scoles Roland Verra y l Diretëur de Repartizion Alexander Prinoth à prejentà la inuvazions chëst’ena a Urtijëi y a La Ila. “Laureron inant cun l sistem paritetich” à sotrissà l Assessëur Mussner. Ala sëires de nfurmazion à partezipà truep zitadins y truepa zitadines partezipan ala discuscion sun l svilup dla scola ladina.

USP - Pro le „Festival da Chors“ che gnarà tignì en domënia, ai 10 d’aurì a Rueun tla Svizra rumancia saràl presënt ince l’assessur ala cultura Florian Mussner. Chësta manifestaziun vëgn metüda a jì tl cheder dla colaboraziun danter i Ladins de Südtirol y i Retoromans dl ciantun Grijun. I cors ladins gnarà rapresentà dal cor dles ëres „Raiëta“ da La Val.

USP - Ai 4 d’aurì 2005 a Urtijëi y ai 5 d’aurì 2005 a La Ila rajonarà l’assessur Florian Mussner y l’intendënt Roland Verra sura la reforma dl sistem scolastich tles scores elementares y mesanes ladines.

USP - La Consulta di jogn y dles jones por le grup de lingaz ladin s’à dè jö inier, mertesc ai 15 de merz 2005 a Porsenù cun le plann anual por la promoziun dl laûr por y cun la jonëza te Gherdëna y tla Val Badia. Al pröm post sön la lista dles prioritês por ci che reverda les infrastrotöres él la realisaziun dl Zënter per Jëuni, Ert y Cultura Gherdëina a Urtijëi. I Sorvisc ai jogn de Gherdëna y dla Val Badia festejarà en chësc ann sü 20 agn de fondaziun cun n valgönes manifestaziuns.

USP - Co se svilupëia pa i pici mituns, co ési pa bogn da imparè y ciünes é pa les metodes educatives plü adatades? De chëstes chestiuns rajonarà le professur Wassilios Fthenakis dl’Université da Porsenù tla incuntada sön la pedagogia por l’infanzia che gnarà tignida ai 17 de merz 2005 a S. Cristina. I referac vëgn organisà dala direziun dla scolina “Ladinia”.

USP - Ince la scora ladina porvarà fora tl ann de scora 2005/2006 la reforma dla scora. Incö lönesc, ai 7 de merz 2005, à la Junta provinziala fat fora sciöche la reforma dla scora gnarà concretisada. Insciö gnaràl porvè fora ince tles scores ladines l’insegnamënt individualisé cun materies de basa, materies opzionales d’oblianza y materies opzionales, le sostëgn individualisé tl imparè tres n tutor y ince le portfolio sciöche stromënt de valutaziun.

USP - Sëgn él dan man i terminns sigüsc por i ejams de concurs di insegnanc dles scores ladines. L’Intendënza ladina sot ala direziun dl ispetur dla scora ladina Lois Ellecosta à metü jö n calënder cun dötes les dates. “La maiù pert di ejams scric gnarà tignis ti dis incër les festes da Pasca” à dit l’ispetur Ellecosta. Insciö po i insegnanc s’arjigné ca ai ejams por tëmp.