Atualità

Conservé les chertes y i documënc storics y i mët a desposiziun a düc i interessá: chisc é i obietifs prinzipai dla colaboraziun danter la Biblioteca Teßmann y l’EURAC che á svilupé dui portai digitai por l’utënza. Le proiet gnará presenté en mercui ai 30 de merz tla sënta dla biblioteca a Balsan.

La Junta provinziala á aprové incö (ai 22 de merz) le dessëgn de lege de reforma dla scora. I assessurs provinziai söl’istruziun Florian Mussner, Christian Tommasini y Philipp Achammer presentará les mudaziuns plü importantes en jöbia ai 24 de merz a Balsan.

Indöt 84 partezipanc á tut pert en vëndres ai 18 de merz ala fasa finala dles Olimpiades de talian a Roma cun concorënc da dötes les Regiuns dla Talia, mo ince dal’Algeria, dala Grecia, dala Germania y dala Spagna. Por le Südtirol á tut pert Lisa Verginer da San Martin de Tor y Philipp Augschöll che é stá bugn da arjunje resultac demorvëia.

Trames döes les biblioteches provinziales da Balsan, la „Claudia Augusta“ y „Dr. Friedrich Teßmann“ lacia alsavëi che les biblioteches restará stlütes da en vëndres ai 25 cina en lönesc ai 28 de merz.

Cun l’ann de scolina 2016/17 gnarál scrit fora de plü concursc por le personal didatich y pedagogich dles scolines dles trëi Intendënzes. Chësc é gnü stabilí inier, ai 15 de merz, dala Junta provinziala sön proposta dl’assessuria por le personal Waltraud Deeg.

Dal florist, al moler, al tlomper y ai istaladus:sön proposta dl assessur Philipp Achammer á la Junta provinziala aprové incö (ai 15 de merz) i ordinamënc formatifs por 11 profesciuns dl lernerat cun cualifica y diplom profescional.

Acompagné y alisiré l’intlujiun de mituns migranc tles scores ladines: chësc é le fin prinzipal dla brosciüra nöia „Educaziun tles valades ladines“ che é gnüda presentada da püch a Al Plan de Mareo y a Urtijëi dal Sorvisc de Consulënza psicopedagogica y por l’integraziun dl’Intendënza ladina. „L’integraziun é n valur important dla scora ladina y i proiec le desmostra“, dij l’assessur Mussner.

Cun 1,2 miliuns de euro sostëgn la Provinzia te na manira consistënta ince por le 2016 les ativités y le program dl Istitut cultural ladin „Micurá de Rü“. La Junta provinziala á aprové inier (08/03) sön proposta dl assessur Florian Mussner chësta soma sciöche finanziamënt dles ativités dl zënter de competënza culturala a bëgn di ladins, di cosć dl personal y dla formaziun por adulc.

Da udëi mo nchin ai 19 de merz sarà la vernissage “Affenwetter” tl atelier dla Lia Mostra d’Ert de Urtijëi sun Plaza Sant Antone: de ndut 22 studëntes y studënc à realisà de plu operes d’ert tl cuntest dl curs de spezialisazion per scultures dla Scola prufescionela per l artejanat artistich “Cademia” de Urtijëi. La ntreda ie debant.

Cun la reforma dl marcé dl laur (Jobs Act) dl govern Renzi mëss ince la Provinzia de Balsan se fistidié por atué n valgönes mudaziuns che reverda l’ordinamënt dl lernerat. Le dessëgn de lege é gnü aprové dala Junta provinziala: al é preodü na norma ad hoc por garantí l’ejam de maturité al intern dla formaziun duala.