Atualità

Diesc agn do la mort dl regist sütirolej ti dedichëia la biblioteca provinziala Teßmann da Balsan na sëra d’aprofondimënt ai 29 d’otober al regist de films Ivo Barnabò Micheli da Bornech. Micheli á realisé i pröms gragn films sön Pier Paolo Pasolini, Heinrich Böll y N.C. Kaser. Ala Teßmann gnarál presenté n liber y n documentar. L’entrada é debann.

Por le setimo iade inviëia plü de 100 biblioteches te döt Südtirol al „De dles Bilioteches“ ai 24 d’otober dl 2015. Al vëgn pité scomenciadies de letöra y ativités leterares tratan döt le findledema y ince cina l’edema che vëgn. Danter l’ater él sön le program incuntades cun i auturs, presentaziun de libri, ativités tles scores yii. De plü é ince les ativités tles valades ladines.

I criters por la conzesciun di contribuc por le sostëgn dles ativités de laur por y cun la jonëza di grups linguistics todësch y ladin é gnüs aprová incö, mertesc ai 20 d’otober, dala Junta provinziala sön proposta dl assessur Philipp Achammer. Le percurs burocratich é gnü scemplifiché, le paiamënt antizipé sará majer.

Le Conservatore Monteverdi de Balsan pitará dal ann academich 2015/16 inant n curs de secundo livel por la formaziun de maestri de musiga che insegna da soné n stromënt: la Junta provinziala á aprové incö, mertesc ai 20 d’otober, la deliberaziun che autorisëia l’ativaziun di cursc. I posć de stüde preodüs é 34 por todësch y 12 por talian.

Per avëi na basa scientifica dla cunescënza dl ladin, tudësch y talian tl scuté su y tl ntendër di mutons dla scolines à la Intendënza ladina metù a jì adum ala Università de Persenon na evaluazion dla situazion atuela. N ressumé di resultac dl svilup linguistich di mutons y dla mutans dl ultimo ann tla scolines ladines uniral prejentà ai 28/10 dala 16.00 a Urtijëi. Duc i interessei ie inviei.

L’anima te situazions dramatiches sciche tl cuntest de viera sarà tl zënter dl referat “L’anima dla viera – La viera tl’anima“ tenì dal dutor spezialisà te psichiatria y psicoterapia Mario Horst Lanczik ai 27 d’utober dala 19.00 tla Galaria Prisma a Bulsan. La relazion fej pert dla curnisc dla mostra 1915-2015 metuda a jì dala Repartizion Cultura ladina y dal Südtiroler Künstlerbund.

Al tema dla migraziun ti dedichëia la biblioteca provinziala Teßmann da Balsan dui apuntamënc. En vëndres ai 23 d’otober sarál da odëi le film „Io sto con la sposa“, premié plü iadi a Aunejia, y en sabeda ai 24 d’otober gnarál presenté de plü publicaziuns y auturs dla leteratöra africana y asiatica.

Laurada sö dal punt d’odüda scientifich, cun na cornisc musicala nöia y arjignada por la paladina: insciö se mostra sëgn l’opereta „Le scioz da San Jênn”. Dan da püch á i auturs Fonso Willeit, Paul Videsott y André Comploi presenté a La Pli de Mareo la publicaziun nöia de „Le scioz da San Jênn” che é gnüda laurada fora en colaboraziun cun le Museum ladin Ciastel de Tor.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015: da udëi iel l’operes premiedes n ucajion dl cuncors artistich sun l centené dla Prima viera mundiela metù a jì dala Repartizion Cultura y Intendënza ladina y dal Südtiroler Künstlerbund. L assessëur Florian Mussner à giaurì la mostra ai 9 de utober tla Galaria Prisma a Bulsan.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015. L unirà metù ora l’opres premiedes n ucajion dl cuncors artistich sun l centené dla Prima viera munidela metù a jì dala Repartizion Cultura y Intendënza ladina y l Südtiroler Künstlerbund. L assessëur Florian Mussner giaurirà la mostra ai 9 de utober dla 19.00 tla Galaria Prisma a Bulsan.