Atualità

Sura 40 agn á Romi Crazzolara lauré te plü inciaries pro les scores dles valades ladines. Naota sciöche maestra, spo sciöche direturia dles scores elemetares dla Val Badia y dla direziun de Mareo y dal 2009 sciöche ispeturia dles scores ladines. „Cun süa profescionalité, dediziun, competënza y respet ára dé n gran contribut por nosta scora ladina y por la formaziun de vita“, insciö l’ass. Mussner.

En ocajiun dl Dé dl’Autonomia vëgnel premié dal presidënt dla Provinzia Arno Kompatscher y dai assessurs por la scora Florian Mussner, Christian Tommasini y Philipp Achammer dötes les maturantes y por düc i maturanc che á fat l’ejam de maduranza tl 2015 y arjunt le majer numer de punc. La premiaziun vëgn a se le dé sön la plaza Silvius Magnago en sabeda ai 05/09 dales 17.00.

Cun l’aprovaziun dla reforma dla scora statala ti á le Parlamënt surandé la competënza ala Provinzia de Balsan da reconësce les abilitaziuns da insigné por todësch stlütes jö te d’atri Stac dl’Uniun europeica. Chësta prozedöra valará ma por i maestri che á l’intenziun da adoré l’abilitaziun a livel provinzial.

Le Departimënt dla scora y cultura de lingaz talian organisëia en jöbia ai 3 de setëmber al’EURAC n convëgn sön l’aprendimënt di lingac.

En ocajiun dl scomenciamënt dla ann nü dles scores de musiga vëgnel metü da jí en mertesc, al 1. de setëmber dales 14.45 tla sënta dla scora profescionala por l’agricoltöra a Auer n convëgn por düc i maestri de musiga dles scores de musiga ladines y todësces. Ala manifestaziun tolarál ince pert l’assessur Achammer, l’intendënt Höllrigl y la direturia dles scores de musiga Vieder.

Nce chëst ann vëniel metù a jì da pert dl Departimënt Educazion y Cultura Ladina l’ancunteda tradiziunela dl Dì dla Scola Ladina per i nsenianc, genitores y i sëurastanc dla scola. La tematica prinzipela de chëst ann sarà l cunzet de "home?work". L assessëur per la scola ladina Florian Mussner y l intendënt Roland Verra giaurirà ufizialmënter l ann de scola 2015/16 ai 03/09 dala 09.00 a Urtijëi.

Ince les scores de musiga s’arjigna ca por le scomenciamënt dl ann de scora nü 2015/16. Tla sënta dla Repartiziun Personal dla Provinzia a Balsan él gnü surandé ai 6 y 7 d’agost indöt 59 di 86 posć a desposiziun. Di cinch posć resservá al grup linguistich ladin é ciamó trëi lëdi.

Nü posć tles scores elementares y trëi posć tles scores mesanes y altes: en vëndres, ai 7 de agost él gnü surandé a Balsan tla sënta dl’Intendënza ladina 12 posć de rode y 37 suplënzes anuales por i insegnanc che á ciafé l’abilitaziun y che é inseris sön les gradatöres tles scores elementares, mesanes y altes ti comuns dla Val Badia y Gherdëna. 26 é i posć de rode assegná ti ultims dui agn.

Euforia, podëi, impotënza y agonia é i temesc de na mostra speziala che gnará daurida ai 9 d’otober a Balsan, cun chëra che la Repartiziun Cultura ladina presentëia i avenimënc dla Gran Vera y la crudelté dla violënza en general te n’elaboraziun artistica nöia. Indöt gnarál mostré les operes d’ert di ot davagnadus dl concurs artistich da inann, che é gnüs chiris fora da püch.

Les domandes online por la conzesciun de n stipendium de stüde y por la retüda dles tasses universitares por l’ann academich 2015/16 podará gní dades jö dai 3 de agost cina ai 30 d’otober dl 2015. Les bandides por i concursc é gnüs aprová dala Junta provinziala sön proposta dl presidënt dla Provinzia Arno Kompatscher.