Atualità

120 scolars dala scora elementara cina la scora alta fej para al proiet “Rundenì de lijëndes”, che vëiga danfora l’elaboraziun de n poem musical por rapresenté musicalmënter la tradiziun de valüta dles liëndes ladines te n contest atual. La pröma rapresentaziun é gnüda presentada inier, 20/04 a Urtijëi, incö sarál les secundes döes (16:30 – 20:30) a Urtijëi y atres döes sará ai 24/04 a San Martin.

Sté chic n momënt y ponsé do a ci che é veramënter important tla vita – chësc é l’impuls che la scomenciadia „Before i die, i’d like to…“ ti ô dé ai jogn y che é gnüda presentada incö, lönesc ai 20 de aurí, a Balsan tl contest di Dis d’aziun de Formaziun politica 2015. Les aziuns sará despartides sö sön döta la Provinzia, dai 23 de aurí ince tles valades ladines.

Le Ciamp Inovaziun y Consulënza informëia che da incö, vëndres ai 17 de aurí, él da ciafé sön süa plata internet ofiziala n codejel de presentaziun y spligaziun dla grafia nöia dl Ladin dla Val Badia. N codejel te na verjiun stampada cun dötes les informaziuns ti gnará proscimamënter metü a desposiziun ai insegnanc y ales insegnantes dles scores ladines dla Val Badia.

Düc i artisć y dötes les artistes dl Südtirol, de Fascia y di trëi Comuns de Suramunt á ciamó tëmp cina ai 29 de má da dé jö sües operes d’ert por le Concurs artistich 1915 – 2015 che é gnü scrit fora dala Repartiziun Cultura ladina en gaujiun dl centená dla Pröma Vera Mondiala. Le valur complessif di pesć é de 20.000 Euro. Ara se trata dla terza ediziun de chësc concurs.

Tl cuntest di proiec de teater urganisei dala Repartizion Cultura y Ntendënza ladina vëniel metù a jì DUMAN, vënerdì, ai 17 d’auril, dala 11:30 tla Cësa de Cultura de Sëlva na reprejentazion teatrela dla sculées y di sculeies dla segonda tlas dla scola mesana de Sëlva dal titul „Ma quando finisce questa guerra?“.

„N’edema de incuntades“: chësc é le moto dl’ediziun 2015 dl Summer Camp dl’Euregio Tirol-Südtirol-Trentin che vëgn organisada por 60 jogn dai 11 ai 14 agn dai 19 ai 26 de messé tl’Istitut Rainerum de Balsan. Al é ciamó posć lëdi, les iscriziuns po gní dades jö cina al pröm de jügn tl Ofize Euregio de Balsan.

Tl cheder dla colaboraziun danter le Departimënt Educaziun y Cultura Ladina y les Scores de musiga ladines él gnü laoré fora le poem musical “Rundenì de lijëndes” por rapresenté musicalmënter la tradiziun de valüta dles liëndes ladines. Le resultat final gnará presenté dai scolars y dales scolares ai 20 y ai 21 de aurí a Urtijëi y ai 24 de aurí a San Martin.

Döes scovertes importantes á fát l’ann passé le Ofize di Bëgns archeologics dla Provinzia che á descurí döes statues menhir dl Eté dl Ram (2.900-2.500 dan G.C.) de marmor de Lasa ciafades a Vetzan tl Vinschgau. Les statues é gnüdes presentades incö (10 de aurí) dal assessur por i bëgns culturai Florian Mussner y dala direturia dl Ofize Catrin Marzoli a Frangart.

www.14-18.europaregion.info: Chësta é la misciun dl portal dediché al centená dla Pröma Vera Mondiala dal’Euregio Tirol-Südtirol-Trentin. Sot ala seziun „Let’s talk“ él poscibl da ciafé vigni mëis temesc nüs cun plü domandes y respostes. Tl mëis de aurí nen vara dl rode dles ëres tratan la perioda de vera dal 1914 al 1918.

La Biblioteca provinziala Teßmann da Balsan organisëia en colaboraziun cun l’assoziaziun “Deutsche Sprache / Zweig Bozen” na sëra d’informaziun dal titul “Lingaz y stil dl jornalism de sensaziun” cun le germanist Andreas Wiesinger che mostrará sö les formes desvalies de publicaziun y les carateristiches tipiches dl jornalism da sensaziun. L’entrada é debann, le referat sará por todësch.