Atualità

La storia dl‘eletrificaziun dl raiun dles Alpes tres les trasmisciuns di archifs é tl zënter dla mostra ambulanta di archifs statai y provinziai dles provinzies dl’ArgeAlp. La mostra ambulanta podarà gnì vijitada por n mëis inće tl’Université Lëdia de Balsan.

L’Ispetorat por les scolines ladines dl’Intendënza scolastica ladina lascia alsavëi che dai 19 ai 21 de jenà dl 2015 saràl poscibl da fà les iscriziuns di mituns y dles mitans tles scolines dles valades ladines por l’ann 2015/16.

Cun le scomenciamënt dl’ann nü saràl poscibl da fà les iscriziuns por l’ann de scora 2015–16 online cun la cherta di sorvisc. Dai 7 de jenà dl 2015 é les iscriziuns davertes por les scores elementares de düć trëi i grups linguistics, tl mëis de forà podaran fà chëres por les scores altes talianes y te merz por les scores altes ladines y todësces y por chëres profescionales.

I Museums Ladins Ćiastel de Tor (San Martin) y Ursus Ladinicus (San Ćiascian) deura indô sües portes ai 26/12 do la palsa sajonala da d’altonn. Ai 30/12 vëgnel metü da jì tl Museum Ladin a San Martin la festa tradizionala por la fin dl ann cun entrada debann al Museum, intratignimënt musical, füć d’artifize, na chentlada jö por la pista da “Picolin” y n sorvisc de trasport da Picolin al Ćiastel.

Le catalogh nü sön la mostra „Le cör dla ćiasa – La stüa tla Val Badia“ de indöt 170 plates y cun na seria ampla de fotografies é gnü presentè inier, domënia (21/12) tl Museum ladin Ćiastel de Tor a San Martin dal assessur por la scora y cultura ladina Florian Mussner.La publicaziun contëgn n’inrescida storica y etnografica dla stüa tla Val Badia y vëgn completada da documentaziuns fotografiches.

Dai 11 - 13.12 iel unì tenì a San Martin n workshop sun la traduzion leterera. "La leteratura ladina ie scialdi viva y davia che l ie mé n pitl cërtl de letëures iel mpurtant jì la streda dla traduzion per fé cunëscer nosta produzions letereres“, à spligà Alexander Prinoth, Diretëur dla Repartizion Cultura Ladina che à metù a jì l workshop adum cun Rep. Cultura tudëscia y la Cësa Editëura Folio.

La presentaziun dl dëssegn de lege sön l’istruziun da pert di trëi assessurs por la scora incö a Balsan é n vare important tla direziun de na regolamentaziun nöia tl setur dl’istruziun. La Junta provinziala â aprovè n mertesc la proposta de lege portada dant dai assessur Achammer, Mussner y Tommasini y che gnarà menada inant insciö al Consëi provinzial.

Le dessëgn de lege sön l’istruziun é gnü aprovè incö (09/12) dala Junta provinziala. Le proscim vare é l’ejaminaziun y l’aprovaziun da pert dl Consëi provinzial. Denant él i assessurs por l’istruziun Florian Mussner, Philipp Achammer y Christian Tommasini che tignarà na conferënza stampa de presentaziun dl dessëgn de lege, en jöbia ai 11 de dezëmber ales 09.00 a Balsan.

Crië ponc d’ancunteda tres l’imaja, l test y la mujiga cun na forma spirituela che porta a esprescion dumandes sun l’esistënza umana: la biblioteca provinziala mët da jì na sëira dedicheda ala vita y al’opera de Hugo Vallazza en juebia ai 11 de dezëmber dala 20. La manifestazion alda pro la lingia de referac “Per ejëmpl la Ladinia".

Scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol po fà domanda ćina ai 18 de dezëmber por stipendiums y retüdes dles tasses scolastiches por l’ann scolastich 2014/15.