Atualità

L’Ofize Chestiuns de cabinet mët a jì, adöm cun l’assoziaziun da Maran „Trait d’Union“ por düć i interessà na sëra d’informaziun sön la vera tl Oriënt Vijin cun jornalisć, scriturs y soziologs. L’incuntada é preodüda en mercui ai 12 de novëmber a Balsan tl Eurac.

La biblioteca Teßmann inviëia ala presentaziun dl liber „99 Fragen an die Geschichte Tirols“ che trata la storia dl Tirol te na manira conzisa y descritiva: le liber respogn a 99 domandes sön la storia dl Tirol, dal Pachet por le Südtirol, a Ötzi y Silvius Magnago cun spligaziuns storiches cörtes, scrites da plü esperć dla storia dl Südtirol. La presentaziun vëgn tignida ai ai 13/11 dales 20.

Da incö (05 de novëmber) inant él poscibl da fà domanda por stipendiums y rembursamënć dles tasses scolastiches por l’ann scolastich 2014/15 por scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol. L’ultimo dé por dè jö la domanda é ai 18 de dezëmber.

La presentaziun dl dessëgn de lege por ći che reverda les mudaziuns dla lege provinziala tl setur dl’istruziun y dl status iuridich dl personal didatich, le cheder cualitatif de referimënt dles scolines y scores y le plann anual dles ativitês scolastiches sportives por l’ann 2015 é stades inier (03/11) les tematiches sön l’ordinn dl dé dla sentada dl plenum dl Consëi scolastich provinzial.

N grup de laûr ti à surandè na petiziun cun indöt 1745 firmes al’assessur Achammer cun la ghiranza da arjunje le reconoscimënt dles ativitês sportives extra-scolastiches sciöche materia facoltativa dl percurs didatich. „Al é öna dles mies prioritês da colié de plü les ofertes sportives cun l’ativité scolastica“, à dit l’assessur, che presentarà tosc na proposta de soluziun.

„Barieres linguistiches: sciöche aspetatives (falades) porta a crises de comprenjiun tles istituziuns“: chësc é le titul dla conferënza publica che gnarà tignida en jöbia, ai 6 de novëmber dales 20:00 tla biblioteca provinziala dla Teßmann a Balsan. Le reladù sarà Florian Menz, linguist de provegnënza südtiroleja.

L’assessëur ladin Florian Mussner ie cuntënt che la ghiranza de tò ite i trëi chemuns ladins dl Tirol storich Fedom, Col y Ampëz tla cunsulënzes per l sustëni dla cultura y rujeneda ladina ie unida apurveda al’unanimità inier (28/10) da pert dla Cumiscion interregiunela di trëi cunsëies legislatifs dl’Euregio Tirol-Südtirol-Trentin (Dreierlandtag).

Milena Fallaha dl Lizeum d’Ert „Cademia“ da Urtijëi é la suranstanta nöia dla Consulta di Studënć por les scores altes dles localitês ladines. La pröma incuntada danter la Consulta di Studënć nöia cun l’Intendënt Roland Verra é gnüda tignida dan da püch a Urtiijëi, te chëra che an à inće rajonè dl proiet „Buona Scuola“. Johannes Geier rapresentëia la Consulta tl Consëi Scolastich provinzial.

Da püch él gnü publichè dal Istitut de Statistica provinzial ASTAT i resultać di ejams de reparaziun dles scores altes. Indöt 3.036 studënć te döt Südtirol à messü dè jö un o plü ejams de reparaziun por podëi passè l’ann de scora. 66 é le numer complessif di studënć dles scores altes tles localitês ladines che s’à presentè ai ejams de reparaziun (de chisc à 56 studënć ciafè n arat positif).

„Pericoli della rete/Straftaten im Netz“ à inom la sëra d’informaziun sön i prighi te Internet y che vëgn metüda a jì dal’Ofize Media audiovisuai dla Repartiziun provinziala dla cultura todëscia adöm ala Polizia statala. L’incuntada é ai 29 d’otober a Balsan.