Atualità

L’alfabetisaziun tla scolina tres le svilup dla cosciënza di sonns, l’insegnamënt dla storia y dla cultura ladina, l’educaziun musicala y plurilinguala: Chisc é ma n valgügn di temesc dles publicaziuns nöies che é gnüdes laorades fora chësc ann dal Departimënt Educaziun y Cultura Ladina tres le Ćiamp Inovaziun y Consulënza (ex IPL) y che vëgn anuzades dales scores sciöche material didatich nü.

Da incö 4 de dezëmber inant é la iesta nöia dla biblioteca provinziala Teßmann online. Le layout dla presënza internet nöia é gnü atualisé cun na forma saurida da odëi cun al zënter i contignüs plü importanć sciöche la chirida tl catalogh, l’aministraziun dl cunt d’imprëst, proieć, vijites y na suravijiun dles manifestaziuns plü atuales. Les informaziuns y i sorvisc é da ciafè te cater lingać.

N moscedoz de lingac desvalis, n stè dlungia y deboriada, ladin, todësch, talian y inglesc sarà da d’aldì y odëi dai 11 ai 13 de dezëmber dl 2014 a S. Martin de Tor: La Repartiziun Cultura y Intendënza ladina y la Repartiziun Cultura todëscia organisëia adöm cun la ćiasa edituria Folio n workshop, olache ara nen va de leteratöra ladina y süa traduziun te lingac desvalis.

Colié la fantasia y la pratica cun l’aprofondimënt de n tema d’atualité: Chësta é stada la sfidada dl proiet „Politische Bildung“ che é gnü organisè dal’Intendënza todëscia adöm a chëra ladina, por tlasses dles scores mesanes, altes y profescionales. Le concurs scolastich é rovè incö (27/11) tla fasa finala cun la presentaziun y valutaziun di 8 mius proieć a Balsan.

Le portal internet www.manif.it cöi adöm y presentëia te na manira scëmpla plü sorts de manifestaziuns, dal ćiamp dla cultura, ala musiga y formaziun, che vëgn metüdes da jì tles valades ladines dl Südtirol: incö, jöbia ai 27 de novëmber él gnü presentè le conzet nü dl portal che vëgn sostignì dales Repartiziuns dla cultura todëscia y ladina.

La Biblioteca Provinziala Dr. Friedrich Teßmann inviëia ala presentaziun dl liber de Hubert Stuppner „Oswald von Wolkenstein: Liebe, List und Leidenschaft“. La vita dl poet y dl componist dl tëmp terdmedieval y sües creaziuns musicales y artistiches é al zënter dla publicaziun nöia che vëgn presentada ai 4 de dezëmber dales 20 Biblioteca Provinziala Dr. Friedrich Teßmann a Balsan.

La conferënza stampa de presentaziun dl portal internet nü www.manif.it preodüda por indoman, vëndres ai 27 de novëmber, gnarà tignida tl Palaz provinzial 2 (plaza Silvius Magnago 10) tla terza alzada. L’orar de scomenciamënt resta dales 11.

Le convëgn „Metamorfosa dla scora“ vëgn tignì en sabeda ai 29 de novëmber tl’aula magna dl’Université Lëdia da Balsan dales 9 ales 13 y traterà les tematiches dl svilup y dl’evoluziun atuala dla scora.

Aldì les propostes por ciafè impulsc concreć tres n dialogh partezipatif: Chësc le fin dles sëres de discusciun danter plü rapresentanc dl monn dla scora ladina che s’à incuntè da püch a San Martin y a Urtijëi por cöi adöm propostes nöies por le svilup dla scora tl dagnì. „Les idees portades dant sarà la basa por na colaboraziun costanta danter les istituziuns“, insciö l’assessur Florian Mussner.

Cun na grafica daldöt nöia che se adatëia inće ales formes plü modernes dla comunicaziun tecnologica se presentëia da püch le portal internet ladin www.manif.it, olache al vëgn racoiü y publiché les manifestaziuns dles valades ladines dl Südtirol. Le portal nü, sostignì dales Repartiziuns Cultura Ladina y Cultura todëscia, gnarà presentè en jöbia ai 27 de novëmber dales 11 a Balsan.