Atualità

Por l’ann scolastich 2015/16 á la Junta provinziala planifiché na soma de 34,2 miliuns de euro sciöche mesi por le finanziamënt dl’assistënza scolastica. „Ma por mirit de n sostëgn adaté ai bojëgns dl’assistënza scolastica pól ince gní garantí i medemi dërc al’istruziun por düc“, sotlignëia l’assessur Philipp Achammer.

Cun incö (12/06) se röia por la maiú pert di scolars dles scores altes y profescionales l’ann de scora, por i mituns dles scolines y por i scolars dles scores elementares y mesanes sará l’ultim de de scora ai 16/06. Por la fin dl ann de scora ti fej i assessurs Mussner, Achammer y Tommasini a düc i scolars y dötes les scolares les mius aodanzes por de beles vacanzes y döt le bun por i ejams finai.

En mercui, ai 17 de jügn gnarál surandé dales 14.00 domisdé (y nia sciöche anunzié denant dales 09.00) indöt 30 posć tles scolines ladines por le proscim ann de scolina. Les maestres che é tles gradatöres por trasferimënc y por inciaries a tëmp determiné é inviades da se presenté tla direziun dles scolines da Piculin.

Les gradatöres provinziales y d’Istitut provisories dles scores elementares, mesanes y altes dles localités ladines por l’ann de scora 2015/16 é gnüdes publicades ai 3 de jügn sön la plata ofiziala dl’Intendënza ladina. Les döes listes ne é nia ciamó definitives.

Le coliamënt dl svilup dla scora ladina cun les recordanzes personales dl maester, diretur y intendënt da denant Franz Vittur é tl zënter dla publicaziun nöia „recordanzes de n maester“ che é gnüda presentada incö (04 de jügn) a Badia. Le liber é gnü dé fora dal Ciamp Inovaziun y Consulënza dl Departimënt Educaziun y Cultura Ladina.

Costruí na rëi de colaboraziun danter i rapresentanc ladins tl’Euregio por sostigní le laur cultural y l’identité ladina: chësta é stada la tematica zentrala dl’incuntada a Balsan danter l’assessur por la cultura ladina Florian Mussner y Luca Agostini (presidënt dl Istitut cultural ladin Cesa de Jan), che é gnü nominé da püch rapresentant cultural di Comuns da Souramont tl’Euregio.

Ai 29 de lugio sarál l’aniversar di 25 agn dala mort de Bruno Kreisky. Por chësta ocajiun inviëia le Archif provinzial a n’incuntada de stüde ai 12 de jügn che jará a funz ala relaziun de Bruno Kreisky cun le Südtirol. Tla Ciasa Kolping da Balsan gnarál tigní de plü referac de plü esperc dla storia locala y internazionala. Al sará ince presënc le presidënt Kompatscher y l’assessur Mussner.

A na sëra d’informaziun cun la presentaziun de n liber nü y de plü referac cörc sön la Pröma Vera Mondiala inviëia la Biblioteca provinziala Teßmann de Balsan ai 09 de jügn dales 20.00 inant. Adöm cun i editurs sarál ince presënc i trëi assessurs por la cultura.

www.14-18.europaregion.info é la misciun che porta al portal web dl’Euregio Tirol-Südtirol-Trentin dediché al centenar dla Gran Vera. Tl mëis de jügn vëgnel ejaminé da plü daimpró l’economia finanziara tratan la Gran Vera, cun l’emisciun de papiers de valüta statai y i pröms voucher dl Comun de Balsan.

Prësc set agn é Elsa Zardini stada a cé dl’Union Generela di Ladins dla Dolomites. Cun la fin de ma ára dé jö süa inciaria. „I oress rengrazié la presidënta Zardini por so laur de volontariat a bëgn dla cultura ladina y ince por le clima de colaboraziun tres produtif y positif“, insciö l’assessur por la cultura ladina Florian Mussner.