Comunicat stampa

Ntan i proscimi trëi ani puderà l’agenzia provinziela per cuestions che reverda l sëurandé lëures publics y servijes lauré mo miec: la Jonta provinziela à (NCUEI) ai 22 de auril dat pro l program de lëur. Chësta agenzia à te chësc mumënt 188 cuncorsc y pruzedures tl lëur che vën fates per cont dla Provinzia, de Chemuns, de Comuniteies de raion y privac.

Tla Rë zivica iel unì giaurì na sezion nueva dla publicazions ladines per sustenì la cura dla rujeneda ladina da pert dla Provinzia de Bulsan. “L suzes di doi libri dl ultimo cuncors de leteratura demostra che la populazion à gran nteres per publicazions ladines” sorissea l assessëur provinziel ladin Mussner n ucajion dl di mundiel dl liber ai 23 de auril.

“Giorgio Napolitano ie te chësc mumënt la persunalità politica de referimënt per majera pert di zitadins. On crëta che si mené y savëi ti jude al Paesc a unì dainora de na fasa drët sajiëula”: chësta ie la tëuta de posizion dl presidënt dla Provinzia Durnwalder do che Napolitano ie unì lità per n segondo iede presidënt dla Republica. Durnwalder rengrazia per si gran respunsabltà istituzionela y si vester de bon cuer cun chël che l à mo n iede metù si bon inuem y si autorità a servisc dla Talia.

80 maestri de schi nueves à tl cheder la fiera ProWinter a Bulsan pudù pië do si diplom, danter chisc nen iel nce stat 28 di luesc ladins. Dala mans di assessëures Widmann y Mussner à 13 maestri de schi pià do l diplom de spezialisazion de telemark y 15 per la spezialisazion de nseniamënt a pitli.

I lëures de adatamënt dla zentreles dal telefonn a na maniera che les vede bën per l internet aslune va inant. Cun doi desëines de zentreles che ie bele anjeniedes per l internet aslune ie mesa la zentreles a post, l’autra meses unirà mo ativedes ntan i proscimi mënsc.

La prejentazion y i servijes dla Presidënza dla Provinzia de Bulsan tl internet ie śën nce da abiné tla rujeneda ladina. La nueva plates web ie da (NCUEI) ai 17 de auril online. “Sciche Presidënza laurons per duta trëi grupes de rujeneda, perchël nes iel mpurtant avëi nce na verscion ladina dla nfurmazion tres internet” sorissea l presidënt dla Provinzia Durnwalder.

40 ani de autonomia te mes’ ëura. Ora de 1500 rodli de films storics amatoriei cun 450 ëura de material video à Federico Campana y Alessandro Bandinelli trat adum l film documenter “stimmen voci ujes” te chël che l vën mustrà su l svilup dl Südtirol ti ultimi dejeneies. Chësc film sarà da udëi (DUMAN) mierculdi, 17 de auril, ntan la sëira de giaurida di dis de film a Bulsan.

Acioche la rujeneda ladina possa tenì l var di tëmps y se svilupé inant, lëura na grupa de esperc da n ann sun paroles nueves. La soluzions per esprescions nueves se adrova tëmp per madurì y la bona ulentà. “Paroles nueves che vede bën nce per la valeda ujina ie de gran valor ajache les ie sciche ziedli per fé su na fundamënta per miëur cuntac danter la valedes ladines” sorissea l assessëur ladin Mussner.

Na valutazion nueva dla documentazions de cunzescions sun la basa di documënc uriginei: chësta dezijion à la Jonta provinziela tëut (N SËIRA) ai 15 de auril. Tratatives cun duta la pertes nteressedes dëssa ntant purté a lascé vester i stritoc. Sun mëisa ie nce la puscibltà de dé ju cuotes dla SEL.

L program “sparani per n cuatier” a na maniera che jëuni ruve plu saurì pra n si cuatier, la gestion tl furnel dal refudam a Bulsan ntan l tëmp de prova y n zënter de cumpetënza nuef tl Università de Bulsan dedicà ala prutezion zevila ie stai i argumënc de majera mpurtanza tratei dala Jonta provinziela ai 15 de auril y prejentei te cunferënza stampa dal presidënt Luis Durnwalder.